ირანმა აშშ-ს სთხოვა, თეირანის ბირთვულ პროგრამასთან დაკავშირებულ მოლაპარაკებებში საკუთარი ინტერესები ისრაელის გავლენისგან დამოუკიდებლად შეაფასოს.

ირანის ეროვნული უშიშროების უმაღლესი საბჭოს გენერალურმა მდივანმა, ალი ლარიჯანიმ, „ალ-ჯაზირასთან“ ინტერვიუში განაცხადა, რომ მოლაპარაკებების პროცესი გრძელდება და რეგიონის ქვეყნებიც ძალისხმევას არ იშურებენ შეხვედრების წარმატებით დასრულებისთვის.

ლარიჯანის თქმით, ომანის საგარეო საქმეთა მინისტრის, ბადრ ბინ ჰამად ალ-ბუსაიდის მეშვეობით აშშ-ისთვის გაგზავნილ წერილზე, რომელიც თეირანის პოზიციას ეხებოდა, ოფიციალური პასუხი ჯერ არ მიუღიათ.

ლარიჯანიმ ხაზი გაუსვა, რომ ირანი მოლაპარაკებებში თანამშრომლობისთვის ღია რჩება და მხარს უჭერს დიალოგს. მისი თქმით, თეირანსა და ვაშინგტონს შორის არსებობს საერთო პოზიცია იმაზე, რომ ირანი არ ფლობს ბირთვულ იარაღს და არც მის მოპოვებას ცდილობს.

მან აღნიშნა, რომ მოლაპარაკებების პროცესი უსაფუძვლოდ არ უნდა გაიწელოს და დასძინა, რომ ირანის სარაკეტო პროგრამა მოლაპარაკებების ნაწილი ვერ იქნება; სხვა საკითხების დამატებამ შესაძლოა პროცესი ჩაშალოს. „ჩვენი სარაკეტო პროგრამა სრულიად განცალკევებული საკითხია ბირთვული პროგრამისგან. ეს არის შიდა საქმე, რომელიც პრინციპულად ჩვენს ეროვნულ უსაფრთხოებასთანაა დაკავშირებული. ამიტომ, ის ვერ გახდება ამ მოლაპარაკებების ნაწილი“, — განაცხადა მან.

ლარიჯანიმ ასევე აღნიშნა, რომ ირანის მიერ ურანის გამდიდრების ნულამდე დაყვანის იდეა „დღის წესრიგში არ დგას“. მისი თქმით, ქვეყნისთვის, რომელმაც ამ ტექნოლოგიაში გამოცდილება შეიძინა, მისი ნულამდე დაყვანა შეუძლებელია. მან განმარტა, რომ გამდიდრებული ურანი საჭიროა ისეთი მიზნებისთვის, როგორიცაა სამედიცინო კვლევები და მკურნალობა.

ირანის მზადყოფნას შესაძლო საფრთხეების მიმართ ხაზი გაუსვა და ისრაელი მოლაპარაკებებში ჩარევასა და რეგიონის დესტაბილიზაციის მცდელობაში დაადანაშაულა. „ჩვენი მოლაპარაკებები სრულად ამერიკის შეერთებულ შტატებთან მიმდინარეობს. ისრაელთან არანაირ მოლაპარაკებებს არ ვაწარმოებთ. თუმცა, ისრაელი ამ პროცესში ჩაერია; მისი მიზანია ამ მოლაპარაკებების ძირის გამოთხრა და საბოტაჟი“, — აღნიშნა ლარიჯანიმ.

ლარიჯანიმ ასევე დასძინა, რომ რეგიონული სტაბილურობის შესანარჩუნებლად ირანი მზად არის ითანამშრომლოს საუდის არაბეთთან, ეგვიპტესა და თურქეთთან.

გასული წლის ივნისში ისრაელთან მომხდარ 12-დღიან კონფლიქტზე საუბრისას, ლარიჯანიმ აღიარა, რომ ირანის სადაზვერვო სამსახური არ ყოფილა ისეთი ძლიერი, როგორადაც მას წარმოაჩენდნენ, თუმცა აღნიშნა, რომ უსაფრთხოების ზომები გაძლიერდა და ისრაელის თავდასხმამ ეროვნული ერთიანობის გრძნობა განამტკიცა.