ბალტიისპირეთის ქვეყანა ესტონეთის პარლამენტმა ახალ პრეზიდენტად იურისტი იულე მადისე აირჩია.
ახალი პრეზიდენტის ასარჩევად ესტონეთის 101-ადგილიან პარლამენტში კენჭისყრა გაიმართა.
ფარულ კენჭისყრაში ერთადერთ კანდიდატად მონაწილე მადისემ 71 ხმა მიიღო და ქვეყნის ახალი პრეზიდენტი გახდა.
მხარდაჭერისა და გამოცხადებული ნდობისთვის მადლობის გადახდისას მადისემ განაცხადა: „ყველაფერს გავაკეთებ ამ ნდობის გასამართლებლად. იმედი მაქვს, რომ ერთმანეთის გაგებით, საჭიროების შემთხვევაში მწვავე კამათით, მაგრამ მაინც ერთმანეთის მხარდაჭერით, ჩვენ ერთად ბევრს მივაღწევთ ესტონეთისთვის და ესტონეთი იქნება ბედნიერი, კარგი და უსაფრთხო ქვეყანა“.
51 წლის იურისტი მადისე 2015 წლიდან იკავებდა იუსტიციის კანცლერის თანამდებობას, რომელიც ესტონეთში საკონსტიტუციო ზედამხედველობისა და ომბუდსმენის ორგანოს წარმოადგენს.
მადისე 12 ოქტომბერს ფიცს დადებს და თავის 5-წლიან უფლებამოსილებას ოფიციალურად შეუდგება.
ესტონეთის მოქმედმა პრეზიდენტმა ალარ კარისმა მანამდე განაცხადა, რომ მეორე ვადით კანდიდატურას აღარ დააყენებდა.
