ადგილობრივი მედიის ცნობით, სამხრეთ კორეის პრეზიდენტმა ლი ჯე მიონმა ორშაბათს, იშვიათი ჟესტით, ჩრდილოეთ კორეას კერძო პირების მიერ განხორციელებული დრონების ფრენების გამო მწუხარება გამოუცხადა და აღნიშნა, რომ ამ ინციდენტებმა ფხენიანთან ზედმეტი სამხედრო დაძაბულობა გამოიწვია.
საინფორმაციო სააგენტო „იონჰაპის“ (Yonhap) ცნობით, ლიმ მინისტრთა კაბინეტის სხდომაზე განაცხადა, რომ გასულ კვირას პროკურატურამ ბრალი წარუდგინა სამ პირს, რომლებსაც 2025 წლის სექტემბრიდან 2026 წლის იანვრამდე პერიოდში ჩრდილოეთ კორეის მიმართულებით დრონების გაშვებაში სდებენ ბრალს.
„მიუხედავად იმისა, რომ ეს ჩვენი მთავრობის ქმედება არ ყოფილა, ჩრდილოეთ კორეის მხარეს ჩემს მწუხარებას ვუცხადებ იმ ზედმეტი სამხედრო დაძაბულობის გამო, რომელიც ასეთმა დაუფიქრებელმა საქციელმა გამოიწვია“, - განაცხადა ლიმ.
მიუხედავად იმისა, რომ ლიმ არაერთხელ გააკრიტიკა ჩრდილოეთ კორეის მიმართულებით უპილოტო საფრენი აპარატების გაშვების მცდელობები, ეს იყო პირველი შემთხვევა, როდესაც მან პირდაპირ გამოხატა სინანული ჩრდილოეთ კორეის მიმართ.
„უკიდურესად სამწუხაროა, რომ ცალკეული პირები ჩრდილოეთ კორეის წინააღმდეგ ასეთ პროვოკაციულ ქმედებებს ახორციელებენ“, - აღნიშნა ლიმ და მსგავსი ქმედებები „მიუღებლად“ შეაფასა. მან ასევე დასძინა, რომ აღნიშნულმა ქმედებებმა სასაზღვრო ზონის მცხოვრებლებში შიში გამოიწვია და ინციდენტმა სერიოზული შეშფოთება დათესა.
მიუხედავად იმისა, რომ პრეზიდენტი 2025 წლის ივნისში თანამდებობის დაკავების შემდეგ ჩრდილოეთ კორეასთან დიალოგის აღსადგენად შერიგების ნიშნებს აძლევდა, ფხენიანმა ეს მცდელობები უარყო და გასულ თვეში სამხრეთ კორეას ოფიციალურად „ყველაზე მტრული სახელმწიფო“ უწოდა.
