სომხეთის პრეზიდენტმა ვაჰაგნ ხაჩატურიანმა პრემიერ-მინისტრ ნიკოლ ფაშინიანის მიერ ფორმირებული ქვეყნის ახალი კაბინეტი დაამტკიცა.
სააგენტო Armenpress-ის ინფორმაციით, ხაჩატურიანმა არჩევნებში გამარჯვებული ფაშინიანის ახალი კაბინეტი დაამტკიცა.
ქვეყნის ახალ კაბინეტში დიდი ცვლილებები არ მომხდარა, თუმცა მაღალტექნოლოგიური მრეწველობის მინისტრის, მხითარ ჰაირაპეტიანის ნაცვლად, რომელმაც მანამდე განაცხადა, რომ საქმიანობას არ გააგრძელებდა, თანამდებობაზე დავით თადევოსიანი დაინიშნა.
საგარეო საქმეთა მინისტრმა არარატ მირზოიანმა, თავდაცვის მინისტრმა სურენ პაპიკიანმა, შინაგან საქმეთა მინისტრმა არპინე სარგსიანმა, ჯანდაცვის მინისტრმა ანაჰიტ ავანესიანმა და ეკონომიკის მინისტრმა გევორგ პაპოიანმა კაბინეტში პოზიციები შეინარჩუნეს.
სომხეთის პარლამენტის თავმჯდომარე კი რუბენ რუბინიანი გახდა, რომელიც სომხეთის პარლამენტის თავმჯდომარის მოადგილისა და თურქეთთან ურთიერთობის საკითხებში სპეციალური წარმომადგენლის მოვალეობას ასრულებდა.
ფაშინიანმა არჩევნებში გაიმარჯვა. სომხეთში 7 ივნისს გამართულ არჩევნებში მონაწილეობა მიიღო 1 მილიონ 476 ათას 769 ადამიანმა, რაც ქვეყნის ამომრჩეველთა საერთო რაოდენობის 58,9%-ს შეადგენს.
ფაშინიანის ხელმძღვანელობით პარტია „სამოქალაქო კონტრაქტმა“ ხმების 49,74% მიიღო, რითაც პარლამენტში კიდევ ერთი ვადით უმრავლესობის მოპოვებისა და მთავრობის ფორმირების უფლება მოიპოვა.
პარლამენტში შესვლა კიდევ ორმა პარტიამ შეძლო: ბიზნესმენ სამველ კარაპეტიანის გაერთიანებამ „ძლიერი სომხეთი“, რომელმაც ხმების 23,27% მიიღო და ყოფილი პრეზიდენტის, რობერტ ქოჩარიანის ალიანსმა „სომხეთი“, რომელმაც ხმების 9,9% მოიპოვა.
