აშშ-ში ბაზირებული ადამიანის უფლებათა დამცველი ჯგუფის ინფორმაციით, ირანში საყოველთაო საპროტესტო აქციების ძალადობრივი ჩახშობისას ათასობით ადამიანი დაიღუპა, თუმცა ხელისუფლების მიერ გამოქვეყნებული ოფიციალური მონაცემები ამაზე ბევრად ნაკლებია.
აქტივისტებმა სამშაბათს განაცხადეს, რომ ქვეყნის მასშტაბით საპროტესტო აქციების დარბევის შედეგად სულ მცირე 6 126 ადამიანია დაღუპული, თუმცა არსებობს შიში, რომ მსხვერპლთა რაოდენობა გაცილებით მეტია.
ახალი მონაცემები ამერიკის შეერთებულ შტატებში მოქმედი ადამიანის უფლებათა დამცველი ჯგუფის სააგენტომ გამოაქვეყნა, რომელიც ირანში არეულობის პერიოდში ზუსტი ინფორმაციის მიწოდებით არის ცნობილი. ჯგუფი თითოეულ გარდაცვალების შემთხვევას ირანში მოქმედი ადგილობრივი აქტივისტების ქსელის მეშვეობით ამოწმებს.
იქიდან გამომდინარე, რომ ხელისუფლებამ ინტერნეტი გათიშა და ისლამურ რესპუბლიკაში სატელეფონო ზარები დაბლოკა, სააგენტო Associated Press-მა ვერ შეძლო დაღუპულთა რაოდენობის დამოუკიდებლად გადამოწმება.
ირანის მთავრობა დაღუპულთა რაოდენობას ბევრად ნაკლებს - 3 117-ს ასახელებს; მათი მტკიცებით, აქედან 2 427 სამოქალაქო პირი და უსაფრთხოების ძალების წარმომადგენელია, ხოლო დანარჩენები -„ტერორისტები“.
წარსულში ირანი მსგავსი ამბოხებების დროს დაღუპულთა რაოდენობას ყოველთვის ამცირებდა ან საერთოდ არ აქვეყნებდა.
