ესპანეთის პრემიერ-მინისტრმა პედრო სანჩესმა, პალესტინის პრეზიდენტ მაჰმუდ აბასთან შეხვედრისას, საერთაშორისო თანამეგობრობას მიმართა და მოუწოდა „ხმა აიმაღლონ“, რათა არ მიეცეს დავიწყებას პალესტინელების მძიმე მდგომარეობა.

ოთხშაბათს, ადამიანის უფლებათა დაცვის დღეს, მონკლოას სასახლეში სიტყვით გამოსვლისას, სანჩესმა ამ მოვლენას ძალზე სიმბოლური უწოდა. მან ყურადღება გაამახვილა ადამიანის უფლებათა საყოველთაო დეკლარაციის გამოცხადების წლისთავზე და ხაზგასმით აღნიშნა, რომ ადამიანის ღირსება „უპირობო, უნიკალური და შეუვალი ღირებულებაა“.

სანჩესმა კიდევ ერთხელ დაადასტურა, რომ მადრიდი მხარს უჭერს ორი სახელმწიფოს პრინციპზე დაფუძნებულ გადაწყვეტას და მას ისრაელ-პალესტინის კონფლიქტის „ერთადერთ შესაძლო გამოსავალად“ მიიჩნევს. მან ასევე აღნიშნა, რომ ბოლო ცეცხლის შეწყვეტა უნდა იყოს რეალური და არა „ფიქციური“, ხოლო მშვიდობიან მოსახლეობაზე თავდასხმები უნდა დასრულდეს.

მადრიდში აბასთან ერთად საუბრისას სანჩესმა განაცხადა: „2025 წელი პალესტინელი ხალხისთვის საშინელი იყო, როდესაც ღაზაში ათიდან ცხრა სახლი საცხოვრებლად უვარგისი გახდა და ათასობით სიცოცხლე და ოჯახი განადგურდა“.

გაეროს პროგნოზებზე დაყრდნობით, სანჩესმა აღნიშნა, რომ მთელ რეგიონში 50 მილიონ ტონაზე მეტი ნანგრევია. მისი თქმით, ფიზიკური აღდგენა დროთა განმავლობაში შესაძლებელი იქნება, თუმცა მთავარი გამოწვევა „იმედის აღდგენაა“ და იმის უზრუნველყოფა, რომ მშვიდობა იყოს უფრო მეტი, ვიდრე „მოკლე შესვენება ომებს შორის“.

„გულწრფელი მშვიდობა სამართლიანობას უნდა ეფუძნებოდეს“

სანჩესმა გააფრთხილა საზოგადოება, რომ ცეცხლის შეწყვეტამ არ დაასრულა მშვიდობიანი მოსახლეობის ტანჯვა: „დღესაც კი, ცეცხლის შეწყვეტის (გამოცხადების) შემდეგ, ღაზაში პალესტინელები კვლავ განიცდიან თავდასხმებს... გულწრფელი მშვიდობა სამართლიანობას უნდა ეფუძნებოდეს. ამ გენოციდზე პასუხისმგებელი პირები, ადრე თუ გვიან, ამა თუ იმ გზით აგებენ პასუხს“.

სანჩესმა აღნიშნა, რომ ესპანეთი და პალესტინა „ყოველთვის ხელჩაკიდებულნი ივლიან“ და იმედი გამოთქვა, რომ აბასის ვიზიტი ხელს შეუწყობს ხიდების აგებას, საერთაშორისო სამართლის ფარგლებში გამოსავლის ძიებასა და ორ ქვეყანას შორის კავშირების განმტკიცებას.

თავის მხრივ, აბასმა მადლობა გადაუხადა ესპანეთს 2024 წლის მაისში პალესტინის სახელმწიფოს აღიარებისთვის. მან შეაქო მადრიდის ლიდერობა პალესტინის აღიარების გასავრცელებლად საერთაშორისო კოალიციის შექმნაში და მოუწოდა ძალადობის დასრულებისკენ ღაზასა და ოკუპირებულ დასავლეთ სანაპიროზე.

ესპანეთი, სადაც პალესტინის საკითხის მიმართ მხარდაჭერა ძლიერია, ევროპაში ერთ-ერთი ყველაზე აქტიური კრიტიკოსი გახდა ისრაელის მიერ ღაზაში წარმოებული ომისა.

2023 წლის ოქტომბრიდან მოყოლებული, ისრაელის ძალებმა 70 000-ზე მეტი ადამიანი მოკლეს, რომელთა უმრავლესობა ქალები და ბავშვები არიან, ხოლო დაახლოებით 171 000 ადამიანი დაშავდა.

ღაზის მთავრობის მედია ოფისის ინფორმაციით, ცეცხლის შეწყვეტის შემდეგ ისრაელის არმიის ცეცხლის შედეგად სულ მცირე 386 ადამიანი დაიღუპა და 980 დაშავდა.