მექსიკაში ძლიერი წვიმების შედეგად გამოწვეულ წყალდიდობის გამო სულ მცირე 42 ადამიანი დაიღუპა, ხოლო 27 დაკარგულია. ოფიციალურმა პირებმა შაბათს განაცხადეს, რომ სტიქიამ ქვეყნის სხვადასხვა რეგიონში სერიოზული ზიანი გამოიწვია.
მექსიკის სამოქალაქო დაცვის ეროვნული კოორდინაციის (CNPC) განცხადების თანახმად, ძლიერმა წვიმებმა ვერაკრუსის, პუებლის, იდალგოს, კერეტაროსა და სან ლუის პოტოსის შტატებში გამანადგურებელი წყალდიდობები გამოიწვია. პირველადი შეფასებით, წყალდიდობას სულ მცირე 42 ადამიანი ემსხვერპლა და სამძებრო-სამაშველო ჯგუფები ინტენსიურად აგრძელებენ მუშაობას დაკარგული 27 ადამიანის მოსაძებნად.
სიტუაციის გაუარესების შიში არსებობს
მექსიკის პრეზიდენტმა კლაუდია შეინბაუმმა ონლაინ შეხვედრა გამართა წყალდიდობით ყველაზე მეტად დაზარალებული ხუთი შტატის გუბერნატორთან და საგანგებო სიტუაციებზე რეაგირების სამუშაოების კოორდინაცია გაუწია. შეინბაუმმა შეხვედრის შემდეგ განაცხადა: "არც ერთი დაზარალებული არ დარჩება დაუხმარებელი. ფედერალური მთავრობიდან ჯგუფები და ოფიციალური პირები გაგზავნილნი არიან გზების აღსადგენად და მოსახლეობისთვის დახმარების გასაწევად".
მექსიკური მედიის ცნობით, ათასობით ადამიანი ელექტროენერგიის გარეშეა დარჩენილი და ეს მოვლენა ბოლო წლების ერთ-ერთ ყველაზე სერიოზულ წყალდიდობად არის შეფასებული. ოფიციალური პირები შიშობენ, რომ მდგომარეობა კიდევ უფრო გაუარესდება მთის ფერდობებზე შესაძლო მეწყერებისა და ადიდებული მდინარეების გამო.
ძლიერი წვიმები ბევრ დაზარალებულ რაიონში გრძელდება და ავტომაგისტრალები, ქუჩები და სახლები კვლავ წყალშია.
