TRT-ის მიერ 2017 წლიდან ორგანიზებული TRT World ფორუმი, რომელიც მსოფლიოს წამყვან ფიგურებს უყრის თავს, გლობალურ დიალოგში წვლილის შეტანას განაგრძობს.

სტამბოლის კონგრეს-ცენტრში დაწყებულ ფორუმზე, რომელსაც პრეზიდენტი რეჯეფ თაიფ ერდოღანიც ესწრება, აკადემიკოსები, ჟურნალისტები, სპორტსმენები, ხელოვანები, პოლიტიკოსები და არასამთავრობო ორგანიზაციების წარმომადგენლები შეიკრიბნენ და მსოფლიოს უმნიშვნელოვანეს საკითხებს განიხილავენ.

ფორუმის პირველ დღეს გახსნითი სიტყვით წარდგებიან პრეზიდენტი რეჯეფ თაიფ ერდოღანი, პრეზიდენტის ადმინისტრაციის კომუნიკაციების დეპარტამენტის ხელმძღვანელი ბურჰანეთინ დურანი და TRT-ის გენერალური დირექტორი მეჰმედ ზაჰიდ სობაჯი.

ვიცე-პრეზიდენტი ჯევდეთ ილმაზი გამოვა ღია სესიაზე სახელწოდებით „თურქეთი: რეგიონული ძალიდან რეგიონთაშორის აქტორამდე“, ხოლო ეროვნული დაზვერვის ორგანიზაციის (MİT) ხელმძღვანელი იბრაჰიმ ქალინი სიტყვით გამოვა სესიაზე „ღაზა საერთაშორისო სამართლისა და ჰუმანიტარული კოლაფსის გზაგასაყარზე“.

TRT World ფორუმი, რომელიც წლების განმავლობაში აერთიანებს საერთაშორისო დღის წესრიგთან დაკავშირებულ განსხვავებულ პერსპექტივებს, მე-10 წელსაც მსოფლიოში ძალთა ცვალებად ბალანსსა და ლიდერობის გაგებას განიხილავს.

ბოლო 10 წლის განმავლობაში ჩატარებულ 86 ღია და 76 დახურულ სესიაზე ფორუმმა 801 სპიკერი ათასობით მონაწილესთან შეახვედრა და განსხვავებული შეხედულებებისა და გამოცდილების გაზიარებისთვის საფუძველი შექმნა.

ფორუმზე, სადაც როგორც გლობალური, ისე რეგიონული პრიორიტეტები და დღის წესრიგი განიხილება, წლევანდელ მთავარ თემებს შორისაა ხელოვნური ინტელექტი, ენერგეტიკული კრიზისები, საერთაშორისო სამართალი და ეკონომიკა.

ფორუმზე წელს გაიმართება ღია სესიები შემდეგ თემებზე:

„თურქეთი: რეგიონული ძალიდან რეგიონთაშორის აქტორამდე“,

„მაღალი რისკის დიპლომატიის დაბრუნება: საშუალო სახელმწიფოები და აღმავალი მრავალპოლარული წესრიგი“,

„ამერიკული პარადოქსი საერთაშორისო სისტემაში“,

„მტკივნეული აღდგენის პროცესისკენ: ახლო აღმოსავლეთის ომების შემდგომი ეროვნული ეკონომიკები“,

„ღაზა საერთაშორისო სამართლისა და ჰუმანიტარული კოლაფსის გზაგასაყარზე“,

„დაკავშირებადობის ახალი გეოპოლიტიკა: საზღვაო გზები, სრუტეები და დერეფნები“,

„ვის ხელშია კონტროლი ალგორითმულ ეპოქაში? კომპანიები, სახელმწიფოები, მოქალაქეები“,

„ენერგეტიკული კრიზისების შემდგომი ბიძგები: ინსტიტუტები წნეხის ქვეშ“,

„პასუხისმგებლობის მართვა ხელოვნური ინტელექტის ეპოქაში“.

გარდა ამისა, დარგის ექსპერტების მონაწილეობით გამართულ მრგვალი მაგიდის შეხვედრებზე განიხილება მრავალი საკითხი - აზია-წყნარი ოკეანის რეგიონის უსაფრთხოების დინამიკიდან ევრაზიულ სტრუქტურამდე, რუსეთ-უკრაინის ომიდან აფრიკის დიპლომატიასა და გეოეკონომიკამდე.