განცხადება მოსკოვისა და კიევის მიერ გასულ კვირას სტამბოლში გამართულ მოლაპარაკებებს მოჰყვა, სადაც ორივე მხარე 1000-1000 პატიმრის გაცვლაზე შეთანხმდა.

აშშ-ის პრეზიდენტმა დონალდ ტრამპმა უკრაინასა და რუსეთს შორის „დიდი“ სამხედრო ტყვეთა გაცვლის შესახებ განაცხადა.

ტრამპმა დამატებითი დეტალების გარეშე Truth Social პლატფორმაზე დაწერა: „ვულოცავ ორივე მხარეს ამ მოლაპარაკებისთვის. შეიძლება თუ არა ამან რაღაც დიდს დაუდოს სათავე“?

ასევე კრემლმაც ამ კვირაში განაცხადა, რომ რუსეთის პრეზიდენტმა ვლადიმერ პუტინმა და ტრამპმა აშშ-სთან ორმხრივი პატიმრების გაცვლის საკითხი განიხილეს.

აშშ-ის პრეზიდენტის უკრაინაში დაუყოვნებლივი ცეცხლის შეწყვეტისკენ მოწოდება კი პუტინმა უარყო.

რუსეთ-უკრაინის მოლაპარაკებები

რუსეთის საგარეო საქმეთა მინისტრმა სერგეი ლავროვმა პარასკევს გაკეთებულ განცხადებაში უკრაინასთან მოლაპარაკებების მეორე რაუნდის მალე გამართვა დაადასტურა.

მოსკოვში, სამხრეთ რუსეთის თემაზე გამართულ კონფერენციაზე სიტყვით გამოსვლისას, ლავროვმა აღნიშნა, რომ სამშვიდობო შეთანხმებაზე მუშაობა გრძელდება და რუსული მხარე ამ საკითხში „მოწინავე ეტაპზეა“ მისული.

ვატიკანის, როგორც მოლაპარაკებების შესაძლო ადგილის შეთავაზების შესახებ მედიაში გავრცელებულ ინფორმაციაზე საუბრისას, ლავროვმა თავისი ეჭვები გამოთქვა და განაცხადა, რომ არსებულ პირობებში ვატიკანისთვის ორი მართლმადიდებლური ქვეყნის დელეგაციების მასპინძლობა „არაკომფორტული“ იქნებოდა.

„წარმოიდგინეთ ვატიკანი, როგორც მოლაპარაკებების ადგილი. მართლმადიდებლური ქვეყნების მიერ კათოლიკურ პლატფორმაზე ძირეული მიზეზების განხილვა საკმაოდ შეუფერებელი იქნებოდა. ვფიქრობ, ეს არც ვატიკანისთვის იქნებოდა დიდად შესაფერისი“, - თქვა მან.

ლავროვმა ასევე დაამატა, რომ მოსკოვი არ დაუშვებს, უკრაინაში რუსულენოვანი მოსახლეობა ზელენსკის მეთაურობით მოქმედი, მის მიერ „ხუნტად“ წოდებული, ადმინისტრაციის ქვეშ დარჩეს.

ლავროვმა განაცხადა, რომ ამის დაშვება რუსეთისთვის „დანაშაული“ იქნებოდა, კიევი კი ასეთ დისკრიმინაციას უარყოფს.

ამასობაში, სახელმწიფო საინფორმაციო სააგენტო TASS-ის ცნობით, რომელიც რუსეთის თავდაცვის სამინისტროს ეყრდნობა, რუსულმა ჯარებმა უკრაინის ხარკოვის ოლქში მდებარე დასახლება რადკივკა დაიკავეს.