აშშ-ში, ნიუ-იორკის თაიმს-სკვერზე (Times Square) თავდამსხმელი ქალი, რომელმაც ერთი ქალი დანით მოკლა და ერთი მამაკაცი დაჭრა, პოლიციის მიერ გახსნილი ცეცხლის შედეგად დაიღუპა.

ნიუ-იორკის პოლიციის უფროსის, ჯესიკა ტიშის მიერ პრესისთვის გაკეთებული განცხადების თანახმად, 49 წლის თავდამსხმელმა თაიმს-სკვერზე საყიდლების ჩანთიდან ამოღებული ორი სამზარეულოს დანით გამვლელებს დაესხა თავს.

თავდამსხმელმა მეტროს სადგურიდან გამოსული 68 წლის მამაკაცი, ხოლო მცირე ხნის შემდეგ კი 32 წლის ქალი მუცლის არეში დაჭრა.

საავადმყოფოში გადაყვანილი დაჭრილებიდან ქალი გარდაიცვალა, მამაკაცის მკურნალობა კი გრძელდება.

თვითმხილველების მიერ გადაღებულ კადრებში ჩანს, რომ სულ მცირე 10 პოლიციელის მიერ ალყაშემორტყმული ქალი უარს ამბობდა დანების დაგდებაზე და სამართალდამცავებს ემუქრებოდა.

მიუხედავად ელექტროშოკური იარაღის (ტეიზერის) გამოყენებისა, ქალი არ გაჩერდა და დანებით პოლიციელებისკენ გაემართა, რის შემდეგაც ორმა პოლიციელმა მას ცეცხლი გაუხსნა.

შემთხვევის ადგილზე თავდამსხმელს ხელბორკილები დაადეს, პირველადი დახმარება აღმოუჩინეს და საავადმყოფოში გადაიყვანეს, სადაც იგი გარდაიცვალა.

ოფიციალური პირების განცხადებით, მომხდართან დაკავშირებით გამოძიება დაიწყო. ამ ეტაპზე ტერორიზმთან კავშირის დამადასტურებელი რაიმე მტკიცებულება არ მოიპოვება.