პრეზიდენტმა ტრამპმა აღნიშნა, რომ თურქეთის რესპუბლიკის პრეზიდენტთან „ბრწყინვალე ურთიერთობა“ აკავშირებს და დაამატა, რომ ნეთანიაჰუსთან შეხვედრაზე ღაზაში თურქული ძალების შესაძლო განლაგების საკითხს განიხილავს.

ორშაბათს, კითხვაზე, განლაგდებიან თუ არა თურქული ჯარები ღაზაში „საერთაშორისო სტაბილურობის ძალების“ (ISF) ფარგლებში, რომელიც გათვალისწინებულია ცეცხლის შეწყვეტის 20-პუნქტიან გეგმაში, ტრამპმა უპასუხა: „პრეზიდენტ ერდოღანთან შესანიშნავი ურთიერთობა მაქვს და ამას განვიხილავთ. თუ მოლაპარაკება პოზიტიურად წარიმართება, ვფიქრობ, ეს კარგი იქნება“.

ბენიამინ ნეთანიაჰუ აშშ-ში მეხუთე ვიზიტს მართავს ტრამპის მეორე საპრეზიდენტო ვადის დაწყების შემდეგ. მისი ვიზიტი ემთხვევა პერიოდს, როდესაც გრძელდება მოლაპარაკებები ღაზას ცეცხლის შეწყვეტის გეგმის მეორე ეტაპზე, რომელიც ოქტომბერში, პალესტინის ანკლავში ისრაელის მიერ ორწლიანი სამხედრო მოქმედებების შემდეგ იქნა მიღწეული.

2023 წლის ოქტომბრიდან მოყოლებული, ისრაელის თავდასხმებმა 71,200-ზე მეტი პალესტინელის სიცოცხლე იმსხვერპლა, ხოლო 171,200-ზე მეტი ადამიანი დაშავდა.

„მზარდი იმედგაცრუება“

ცეცხლის შეწყვეტის შეთანხმების პირველი ეტაპი მოიცავდა ომის შეჩერებას, ისრაელის ძალების ნაწილობრივ გაყვანას, ისრაელის მიერ დაკავებული ასობით პალესტინელის გათავისუფლების სანაცვლოდ ყველა ისრაელელი მძევლის (ცოცხლისა და გარდაცვლილის) გაცვლას და ღაზაში „სრულმასშტაბიანი ჰუმანიტარული დახმარების“ გაგზავნას.

ტრამპის 20-პუნქტიან სამშვიდობო გეგმაში ჩამოყალიბებული მეორე ეტაპი კი ითვალისწინებს ისრაელის სრულ გასვლას ღაზიდან, ჰამასის განიარაღებას, რეგიონში საერთაშორისო სტაბილურობის ძალების (ISF) განლაგებას და პალესტინის „ტექნოკრატიული“ კომიტეტის შექმნას ღაზას დროებითი მართვისთვის. ისრაელი წინააღმდეგია ISF-ში თურქული ქვედანაყოფების მონაწილეობისა.

ცეცხლის შეწყვეტის შეთანხმების მიუხედავად, ისრაელი კვლავ თითქმის სრულად ბლოკავს ღაზას გამშვებ პუნქტებს, რაც ხელს უშლის რეგიონში გადასატანი სახლებისა და სარეკონსტრუქციო მასალების შეტანას და კიდევ უფრო ამწვავებს ჰუმანიტარულ კრიზისს, რომელიც 2 მილიონზე მეტ ადამიანს ეხება.

საინფორმაციო სააგენტო Axios-მა გასულ კვირას, აშშ-ის ანონიმურ ოფიციალურ პირებზე დაყრდნობით, გაავრცელა ინფორმაცია, რომ ტრამპის მაღალი რანგის გუნდი „სულ უფრო მეტ იმედგაცრუებას“ გამოხატავს ნეთანიაჰუს ქმედებების გამო, რომლებიც „ძირს უთხრის მყიფე ზავს“. ტრამპმა ასევე აღნიშნა, რომ იმედოვნებს, ღაზას გეგმის მეორე ეტაპს „ძალიან სწრაფად“ მიაღწევენ.

ვენესუელა და ირანი

ამასთანავე, ტრამპმა განაცხადა, რომ აშშ-მა ცოტა ხნის წინ ვენესუელაში დაარტყა პორტის ზონას, სადაც, სავარაუდოდ, ნარკოტიკებით დატვირთული ნავები იმყოფებოდა. მისი თქმით, დარტყმამ „დიდი აფეთქება“ გამოიწვია და აღნიშნული ობიექტი აღარ ფუნქციონირებს.

აშშ-ის პრეზიდენტმა დაამატა, რომ სამიზნეს წარმოადგენდა სანაპირო ობიექტი, რომელიც ზღვით ნარკოტიკების გადასაზიდად იყო მომზადებული. „ყველა ნავს დავარტყით და ახლა უკვე ტერიტორიასაც,“ - განაცხადა მან. ტრამპს არ დაუკონკრეტებია, აშშ-ის სამხედრო ძალების რომელმა ქვედანაყოფმა განახორციელა ოპერაცია.

კითხვაზე, შეხვდა თუ არა ვენესუელის პრეზიდენტ ნიკოლას მადუროს, ტრამპმა უპასუხა, რომ მასთან კონტაქტი „საკმაოდ ახლო წარსულში“ ჰქონდა, თუმცა „აქედან ბევრი არაფერი გამოსულა“. კარაკასს არც შეხვედრასა და არც სავარაუდო თავდასხმაზე კომენტარი არ გაუკეთებია.

ტრამპმა ირანის საკითხსაც შეეხო და აღნიშნა, რომ თუ ივნისში დაბომბილი ბირთვული ობიექტების აღდგენა დაიწყება, აშშ სასწრაფოდ განახორციელებს ახალ იერიშებს. „მესმის, რომ ირანი ძალების აღდგენას ცდილობს და თუ ეს ასეა, ჩვენ მათ უნდა ვაჯობოთ. მათ მიწასთან გავასწორებთ,“ - თქვა მან, თუმცა დაამატა, რომ მზად არის „ბევრად უფრო ჭკვიანური“ შეთანხმების მოსალაპარაკებლად.