უკრაინის პრეზიდენტმა ვოლოდიმირ ზელენსკიმ განაცხადა, რომ ქალაქ ოდესასა და ზაპოროჟიეს ოლქზე რუსული არმიის მიერ განხორციელებული საჰაერო თავდასხმების შედეგად 4 ადამიანი დაიღუპა.
ზელენსკიმ სოციალურ ქსელში გავრცელებულ განცხადებაში აღნიშნა, რომ რუსულმა არმიამ ღამით ოდესაში საცხოვრებელ კორპუსზე სარაკეტო თავდასხმა განახორციელა.
ზელენსკის ინფორმაციით, თავდასხმის შედეგად 2 ადამიანი დაიღუპა, ხოლო 5 დაშავდა, მათ შორის 3 ბავშვია. მან ასევე დასძინა, რომ ზაპოროჟიეს ოლქზე განხორციელებული თავდასხმის შედეგად 2 ადამიანი დაიღუპა და 5 დაშავდა.
უკრაინის პრეზიდენტმა ასევე აღნიშნა, რომ ჩერნიჰივისა და ხარკივის ოლქებზე განხორციელებული რუსული თავდასხმების შედეგად 4 ადამიანი დაშავდა.
ზელენსკიმ თავის მიმართვაში განაცხადა, რომ რუსეთმა ღამით ქვეყნის წინააღმდეგ განხორციელებული თავდასხმებისას 8 რაკეტა და 130 საბრძოლო უპილოტო საფრენი აპარატი გამოიყენა.
