გავრცელდა ინფორმაცია, რომ „ჭკვიანმა წამალმა“, რომელიც ხელს უშლის სიმსივნურ უჯრედებს მკურნალობისგან დამალვაში, კიბოს ექვს ყველაზე გავრცელებულ ტიპში სიმსივნეების ზომა მინიმუმ 30%-ით შეამცირა. კლინიკური კვლევის ადრეული ეტაპის შედეგები მოწმობს, რომ პრეპარატი იმედისმომცემია.

ოქსფორდელმა მკვლევრებმა შეიმუშავეს ახალი პრეპარატი, რომლის მიზანია სიმსივნური უჯრედების იმუნური სისტემისგან დამალვის აღკვეთა. ეს პრეპარატი იმუნურ სისტემას საშუალებას აძლევს, აღმოაჩინოს და გაანადგუროს კიბოს უჯრედები.

კვლევებში, რომლებიც მოიცავდა დიდ ბრიტანეთს, საფრანგეთს, ესპანეთსა და ავსტრალიას, საშვილოსნოს ყელის, შარდის ბუშტის, ღვიძლის, ნაწლავის, ფილტვის, ასევე თავისა და კისრის კიბოს მქონე 83 პაციენტს ექსპერიმენტულ პრეპარატთან, „GRWD5769“-თან ერთად, იმუნოთერაპიული პრეპარატი „cemiplimab“-ი მიეცა.

მანჩესტერში Christie NHS Foundation-ის მიერ ჩატარებულ კვლევაში დადგინდა, რომ 26 პაციენტში სიმსივნე შემცირდა. ამ პაციენტებიდან 15-თან სიმსივნის ზომის მინიმუმ 30%-იანი კლება დაფიქსირდა.

აღინიშნა, რომ კვლევაში მონაწილე ყველა პაციენტი მანამდე ჩატარებულ მკურნალობაზე რეაგირებას არ ახდენდა და უმეტესობას მკურნალობის სხვა გზა აღარ ჰქონდა დარჩენილი. მათ შემთხვევაში იმუნოთერაპიამ მანამდე ან საერთოდ არ იმუშავა, ან ეფექტი დაკარგა.

შემუშავებულმა „ჭკვიანმა წამალმა“ სიმსივნურ უჯრედებს „უხილავობის ფარი“ მოხსნა და ისინი იმუნური სისტემის იმ უჯრედებისთვის გახადა ხელმისაწვდომი, რომლებიც ინფექციებსა და დაავადებებს ებრძვიან. ამგვარად, იმუნოთერაპიულმა პრეპარატმა შეძლო კიბოს უჯრედების მიზანში ამოღება და განადგურება.

კვლევის შედეგები წარდგენილ იქნა ჩიკაგოში გამართულ მსოფლიოს უდიდეს კიბოს კონფერენციაზე — ამერიკის კლინიკური ონკოლოგიის საზოგადოების (ASCO) ყოველწლიურ შეხვედრაზე.

აღმოჩნდა, რომ პრეპარატმა GRWD5769 სიმსივნეები კვლევაში ჩართული კიბოს ექვსივე ტიპის შემთხვევაში შეამცირა. პრეპარატმა დაავადების პროგრესირება მინიმუმ ექვსი თვის განმავლობაში შეაჩერა:

საშვილოსნოს ყელის კიბოს მქონე პაციენტების 18%-ში;

ღვიძლის კიბოს მქონე პაციენტების 32%-ში;

შარდის ბუშტის კიბოს მქონე პაციენტების 36%-ში;

თავისა და კისრის კიბოს მქონე პაციენტების 38%-ში;

ნაწლავის კიბოს მქონე პაციენტების 51%-ში;

ფილტვის კიბოს მქონე პაციენტების 55%-ში.

წარმატების ძლიერი სიგნალი ადრეულ ეტაპზე

კვლევის ხელმძღვანელმა, პროფესორმა ფიონა თისლთვეიტმა (Fiona Thistlethwaite), რომელმაც კონფერენციაზე კლინიკური კვლევის პირველი ფაზის შედეგები წარადგინა, ხაზგასმით აღნიშნა, რომ ამ წამლის მიერ ადრეულ ეტაპზე მიღწეული წარმატება ძალიან შთამბეჭდავია. მისი თქმით, წამალი აბის სახითაა, რომლის მიღებაც პაციენტს სახლში შეუძლია. თისლთვეიტმა განაცხადა, რომ ეს პრეპარატი, რომელიც ახალი მექანიზმით მუშაობს, აშკარად უწყობს ხელს იმუნოთერაპიის ეფექტურობის გაზრდას.