სამშაბათს, კანადის პარლამენტის ახალი სესიის გახსნისას, მეფე ჩარლზმა აშშ-ის პრეზიდენტ დონალდ ტრამპის მიერ კანადის ანექსიის მუქარა ირიბად გააკრიტიკა.
თუმცა მეფეს ტრამპის სახელი პირდაპირ არ უხსენებია და აშშ-ის ლიდერისადმი კრიტიკა ძირითადად რბილი ენით გამოხატა, ნათლად გაუსვა ხაზი, რომ კანადა კანადად დარჩება.
„დემოკრატია, პლურალიზმი, კანონის უზენაესობა, თვითგამორკვევის უფლება და თავისუფლება, ეს ის ღირებულებებია, რომლებსაც კანადელები აფასებენ და რომელთა დაცვაც მთავრობის მტკიცე გადაწყვეტილებაა“, - თქვა მეფემ.
27-წუთიანი „სატახტო სიტყვის“ ბოლოს ჩარლზმა დაამატა: „ნამდვილი ჩრდილოეთი ნამდვილად ძლიერი და თავისუფალია“. ამ სიტყვებს დეპუტატების, სენატორებისა და სხვა დამსწრეების მხრიდან ხანგრძლივი და მქუხარე ტაში მოჰყვა.
ეს იყო მესამე „სატახტო სიტყვა“, რომელშიც სამეფო ოჯახის წევრმა მთავრობის სამომავლო გეგმები წარმოადგინა, მას შემდეგ, რაც კანადა 1867 წელს ცალკე ერად ჩამოყალიბდა. ჩარლზი დედის, დედოფალ ელისაბედ II-ის, გზას გაჰყვა, რომელმაც ეს 1957 და 1977 წლებში გააკეთა.
ჩარლზის მიერ წაკითხული ეს სიტყვა შესაძლოა კანადის ისტორიაში ერთ-ერთი უმნიშვნელოვანესი სატახტო სიტყვა იყოს, რადგან ეს ერთა თანამეგობრობის წევრი ქვეყანა სუვერენიტეტის დასაცავად იბრძვის იმ დროს, როდესაც ტრამპი კვლავ გამოთქვამს კანადის აშშ-ის 51-ე შტატად გადაქცევის იდეას.
სამეფო ვიზიტი და „სატახტო სიტყვის“ წაკითხვა კანადის, როგორც დამოუკიდებელი ერის, სუვერენიტეტის განმტკიცების მიზნით მოეწყო.
მიუხედავად იმისა, რომ ტრამპი დროდადრო ამბობს, რომ ანექსიის იდეა მხოლოდ ხუმრობაა, პრემიერ-მინისტრი მარკ კარნი და სხვა პოლიტიკოსები ტრამპს აკრიტიკებენ და მიიჩნევენ, რომ მუქარა კვლავ ძალაშია.
კანადა ერთა თანამეგობრობის წევრია – დამოუკიდებელი ორგანიზაცია, რომელიც აერთიანებს 56 ქვეყანას გაერთიანებულ სამეფოსთან ისტორიული კავშირებით. მეფე ამ თანამეგობრობის სიმბოლური ლიდერის როლს ასრულებს.
მიიღებს თუ არა ტრამპი ამ გზავნილს, გაურკვეველია.
„სატახტო სიტყვა“ ძირითადად მთავრობის მიერ დაიწერა და სუვერენიტეტის საკითხის გარდა, სხვა თემებსაც შეეხო, როგორიცაა ხელმისაწვდომი საცხოვრებელი, გარემოს დაცვა, ადგილობრივი მკვიდრი მოსახლეობის პრობლემები და საზღვრის უსაფრთხოება.
