პრეზიდენტმა დონალდ ტრამპმა განაცხადა, რომ საჭიროების შემთხვევაში აშშ-ის სამხედრო-საზღვაო ძალები შეძლებენ ჰორმუზის სრუტეში გამავალი ნავთობტანკერების ესკორტირებას, და ასევე გასცა განკარგულება ყურეში მავალი გემებისთვის სადაზღვევო გარანტიების უზრუნველყოფის შესახებ.
პლატფორმა Truth Social-ზე ტრამპმა დაწერა, რომ აშშ-ის საერთაშორისო განვითარების საფინანსო კორპორაციას (DFC) დაავალა, გონივრულ ფასად უზრუნველყოს „პოლიტიკური რისკის დაზღვევა და გარანტიები“.
„ამიერიდან, ყველა საზღვაო კომერციული გემის, განსაკუთრებით კი ენერგომატარებლების გადამზიდავი გემების ფინანსური უსაფრთხოების უზრუნველსაყოფად, რომლებიც ყურეს გადიან, აშშ-ის განვითარების საფინანსო კორპორაციას ვუბრძანე, ძალიან გონივრულ ფასად უზრუნველყოს პოლიტიკური რისკის დაზღვევა და გარანტიები“, — დაწერა ტრამპმა და დასძინა, რომ ეს დაზღვევა ყველა გადამზიდ ხაზზე გავრცელდება.
„საჭიროების შემთხვევაში, ამერიკის შეერთებული შტატების სამხედრო-საზღვაო ძალები უმოკლეს ვადებში დაიწყებენ ჰორმუზის სრუტეში ტანკერების ესკორტირებას. რაც არ უნდა მოხდეს, ამერიკის შეერთებული შტატები უზრუნველყოფს ენერგიის თავისუფალ მიწოდებას მსოფლიოსთვის“, — განაცხადა მან.
ტრამპმა ასევე აღნიშნა, რომ შესაძლოა დამატებითი ზომებიც იქნას მიღებული და დასძინა, რომ „აშშ-ის ეკონომიკური და სამხედრო ძალა შეუდარებელია“.
ეს განცხადებები მოჰყვა ირანის მიერ ამ კვირაში გაჟღერებულ მუქარას იმ გემების წინააღმდეგ, რომლებიც გადიან სრუტეს — გლობალური ენერგომომარაგებისთვის უმნიშვნელოვანეს საზღვაო მარშრუტს.
გავრცელდა ინფორმაცია, რომ რეგიონში რამდენიმე ნავთობტანკერზე თავდასხმა უკვე განხორციელდა.
ზოგიერთმა საზღვაო მზღვეველმა, მათ შორის Skuld-მა, Steamship Mutual-მა და North Standard-მა, აცნობეს კლიენტებს, რომ წყვეტენ მიმდებარე წყლებში ომით გამოწვეული ზიანის დაზღვევას.
ჰორმუზის სრუტე ვიწრო საზღვაო გასასვლელია, რომელიც სპარსეთის ყურეს არაბეთის ზღვასთან აკავშირებს და ნავთობის მსოფლიო გადაზიდვებისთვის ერთ-ერთი ყველაზე მნიშვნელოვანი მარშრუტია.
რეგიონში მზარდმა დაძაბულობამ გამოიწვია შეშფოთება კომერციული საზღვაო გადაზიდვების უსაფრთხოებისა და გლობალურ ენერგეტიკულ ბაზრებზე შესაძლო ზეგავლენის გამო.
