პრეზიდენტმა რეჯეფ თაიფ ერდოღანმა განაცხადა, რომ ახლა, როდესაც დიპლომატიური ურთიერთობები 100 წლისთავს უახლოვდება, ისინი ამერიკასთან სტრატეგიულ თანამშრომლობას ყველა სფეროში ავითარებენ.

ერდოღანმა „თურქეთის სახლში“ (Türkevi) გამართულ თურქეთ-აშშ-ის ბიზნესსაბჭოს შეხვედრაზე სიტყვით გამოსვლისას მადლობა გადაუხადა ამერიკის სავაჭრო პალატას, ბიზნესსაბჭოებსა და საგარეო ეკონომიკური ურთიერთობების საბჭოს შეხვედრის ორგანიზებისთვის.

„აშშ-თან ჩვენი სტრატეგიული თანამშრომლობა ყველა სფეროში ვითარდება. გვსურს, პოლიტიკურ ურთიერთობებში მიღწეული ჰარმონია ეკონომიკურ და სავაჭრო ურთიერთობებზეც აისახოს“, — განაცხადა ერდოღანმა და სიტყვა შემდეგნაირად გააგრძელა:

„დღეს ამერიკა პირველ ადგილზეა ჩვენს თხევადი ბუნებრივი აირის (LNG) მომწოდებლებს შორის. ამგვარად, ჩვენ ვართ ევროპაში იმ ქვეყნების სათავეში, რომლებიც უპირატესობას ამერიკულ რესურსს ანიჭებენ. ჩვენი მიზანია ამ თანამშრომლობის გაფართოება მთელ ენერგეტიკულ სექტორზე, ბირთვული ენერგიის ჩათვლით. მეორე მხრივ, ამერიკასთან ჩვენი ეკონომიკური ურთიერთობების მხოლოდ სავაჭრო მაჩვენებლებით შეფასება სწორი არ არის. მიმაჩნია, რომ იმ პერიოდში, როდესაც გლობალური ეკონომიკური წესრიგი თავიდან ყალიბდება, თურქეთთან სტრატეგიული ეკონომიკური თანამშრომლობის მოდელის აუცილებლობა არსებობს“.

ენერგომარშრუტები ხელახლა იხაზება

პრეზიდენტმა ერდოღანმა აღნიშნა, რომ კონფლიქტების დასრულებასთან ერთად რეგიონში ხუთი დიდი ტრანსფორმაცია დაჩქარდება.

ერდოღანმა განმარტა, რომ აქედან პირველი მიწოდების ჯაჭვების გადანაწილებაა, როდესაც კომპანიები უკვე ეძებენ არა უბრალოდ ყველაზე იაფ, არამედ ყველაზე საიმედო ადგილს: „თურქეთი, თავისი ძლიერი ინდუსტრიული ინფრასტრუქტურით, რომელიც ევროკავშირთან საბაჟო კავშირსა და თავისუფალი ვაჭრობის ფართო ქსელზეა დაფუძნებული, ამ ძიების ბუნებრივი მისამართია“.

ერდოღანმა აღნიშნა:

„მეორე — ენერგომარშრუტები ხელახლა იხაზება. ბაქო-თბილისი-ჯეიჰანიდან დაწყებული TANAP-ით დამთავრებული, თურქეთი უწყვეტი ენერგონაკადის ყველაზე საიმედო დერეფანია. მესამე — იცვლება სავაჭრო დერეფნები. შუა დერეფანი, რომელიც აზიას ევროპასთან აკავშირებს, და „განვითარების გზა“, რომელიც ყურის რეგიონს ევროპასთან აკავშირებს, თურქეთში იკვეთება. მეოთხე — იწყება აღდგენა-მშენებლობის პერიოდი. ჩვენს რეგიონში თავიდან აშენდება გზები, პორტები, ელექტროსადგურები, საცხოვრებელი სახლები და ქარხნები. თურქული სამშენებლო სექტორი, რთულ გეოგრაფიულ პირობებში მუშაობის გამოცდილებით, ამ პროცესისთვის ყველაზე მომზადებული აქტორია. მეხუთე — თავდაცვა და მოწინავე ტექნოლოგიები. ჩვენმა თავდაცვითმა მრეწველობამ, რომელიც ნატოს სტანდარტების შესაბამისად აწარმოებს პროდუქციას, მიაღწია იმ სიმძლავრეს, რომ წვლილი შეიტანოს ჩვენი მოკავშირეების მომარაგების უსაფრთხოებაში. იმისათვის, რომ ჩვენმა ქვეყანამ ისარგებლოს ამ გარდაქმნის შესაძლებლობებით, აპრილში განვახორციელეთ მსოფლიოში ერთ-ერთი ყველაზე კონკურენტუნარიანი საინვესტიციო პაკეტი. ჩვენი საზღვარგარეთის წარმომადგენლობები, პირველ რიგში კი ვაშინგტონისა და ნიუ-იორკის საინვესტიციო და საფინანსო ოფისები, ყოველთვის მზად არიან თქვენს მხარდასაჭერად“.

ერდოღანმა ბიზნესმენებს თურქეთ-ამერიკის ურთიერთობების განმტკიცებისთვის გაწეული ძალისხმევისთვის მადლობა გადაუხადა.