აშშ-ის ძალებმა შაბათს საღამოს ვენესუელის სანაპიროებთან, უკანონო ნარკოტიკების გადამზიდავი კიდევ ერთი გემი ჩაძირეს. აშშ-ის პრეზიდენტმა დონალდ ტრამპმა განაცხადა, რომ ამ ოპერაციის შემდეგ, ისინი ყურადღებას გაამახვილებენ სახმელეთო გზით ნარკოტიკების კონტრაბანდაზეც.
ტრამპის განცხადებები კვირას, ნორფოლკის საზღვაო ბაზაზე, ავიამზიდ „ჰარი ს. ტრუმენის“ გვერდით გაკეთდა. მაშინვე არ იყო ნათელი, უკავშირდებოდა თუ არა ტრამპის მიერ ნახსენები ოპერაცია აშშ-ის თავდაცვის მდივნის, პიტ ჰეგსეტის, პარასკევს გამოცხადებულ თავდასხმას.
ტრამპმა განაცხადა: „ბოლო კვირების განმავლობაში, საზღვაო ფლოტი მხარს უჭერდა ჩვენს მისიას, რომელიც კარტელების ტერორისტების წყალქვეშ გაგზავნას ისახავს მიზნად... გუშინ ღამით კიდევ ერთი ოპერაცია განვახორციელეთ. ახლა მათ ვეღარ ვპოულობთ.“
აშშ-ის ოფიციალური პირების განცხადებით, ამ დრომდე ამ თავდასხმებში სულ მცირე 21 ადამიანი დაიღუპა. თეთრი სახლი ამტკიცებს, რომ ეს თავდასხმები, რომელთა დროსაც სულ მცირე ოთხი ნავი განადგურდა, ხელს უშლის ნარკოტიკების აშშ-ში მოხვედრას.
სახმელეთო ოპერაციები დღის წესრიგშია?
ტრამპმა განაცხადა, რომ მისი პოლიტიკა მუშაობს და სამხედრო ოპერაციები შესაძლოა სახმელეთო გზებზეც გავრცელდეს. „ისინი აღარ მოდიან ზღვით, ამიტომაც მოგვიწევს სახმელეთო გზებზე დაკვირვება. და ნებას მიბოძეთ გითხრათ, ეს მათთვისაც კარგად არ დამთავრდება,“ - აღნიშნა მან.
ექსპერტები მიიჩნევენ, რომ ტრამპის კვირას გაკეთებულ განცხადებაში გამოყენებული ფრაზა „გუშინ ღამით“, მიუთითებს სხვა სასიკვდილო თავდასხმაზე, რადგან პენტაგონის ბოლოს გამოცხადებული ოპერაცია პარასკევს მოხდა. ამ ოპერაციის დროს, ვენესუელის სანაპიროებთან პატარა ნავზე მყოფი ოთხი დაუდგენელი პირი, რომლებიც „ნარკო-ტერორისტებად“ იყვნენ მიჩნეულნი, დაიღუპა.
აშშ-ის დემოკრატიული პარტიის ლიდერები და მრავალი იურიდიული ექსპერტი კითხვის ნიშნის ქვეშ აყენებენ უცხო ან საერთაშორისო წყლებში, დაუკითხავი ან შეუჩერებელი ეჭვმიტანილების წინააღმდეგ სასიკვდილო ძალის გამოყენების კანონიერებას.
