აფეთქება ოსლოში აშშ-ის საელჩოში

ნორვეგიის დედაქალაქ ოსლოში მდებარე ამერიკის შეერთებული შტატების საელჩო კვირას დილით მომხდარმა აფეთქებამ შეძრა. ოსლოს პოლიციამ განაცხადა, რომ შემთხვევის შედეგად არავინ დაშავებულა, აფეთქების მიზეზი კი ჯერჯერობით უცნობია.

პოლიციის განცხადებით, აფეთქება ადგილობრივი დროით დაახლოებით 01:00 საათზე (00:00 GMT) მოხდა და შენობის ერთ-ერთ შესასვლელთან მხოლოდ „მცირე მატერიალური ზიანი“ გამოიწვია.

განცხადებაში ნათქვამია, რომ შემთხვევის ადგილზე მომუშავე ჯგუფები ძაღლების, უპილოტო საფრენი აპარატებისა და ვერტმფრენების დახმარებით „ერთი ან მეტი შესაძლო დამნაშავის“ კვალს ეძებენ.

„პოლიცია ძალიან სერიოზულად ეკიდება საზოგადოებრივ ადგილებში მომხდარ მსგავს შემთხვევებს და ამ საქმეს მნიშვნელოვანი რესურსებითა და მაღალი პრიორიტეტით იძიებს“.

პოლიციის წარმომადგენელმა, მაიკლ დელემირმა TV2-თან საუბრისას აღნიშნა, რომ ვინაიდან გამოძიება ჯერ კიდევ ადრეულ ეტაპზეა, ისინი „ზიანის ტიპის, აფეთქებული ნივთიერებისა და მსგავსი დეტალების შესახებ“ კომენტარს არ გააკეთებენ.

მოგვიანებით დელემირმა TV2-სთვის მიცემულ სხვა განცხადებაში აღნიშნა, რომ პოლიციას „აქვს წარმოდგენა შემთხვევის მიზეზთან დაკავშირებით“ და დასძინა: „ჩვენი აზრით, ეს ვიღაცის მიერ განხორციელებულ ქმედებას ჰგავს“.

ოფიციალური პირის თქმით, გამოძიების ფარგლებში მიმდინარეობს მოწმეებთან გასაუბრება. TV2 ასევე იტყობინება, რომ შემთხვევის ადგილზე იმყოფებოდა გამნაღმველთა ჯგუფი.

პოლიციამ განმარტა, რომ საქმესთან დაკავშირებით კონტაქტზე არიან საელჩოსთან და აფეთქებიდან რამდენიმე საათის შემდეგ შენობის მიმდებარე ტერიტორია მოსახლეობისა და გამვლელებისთვის „უსაფრთხოდ“ იქნა მიჩნეული.

პოლიციამ ასევე სთხოვა მოსახლეობას, მიაწოდონ ინფორმაცია ნებისმიერი საეჭვო ვითარების ან დაკვირვების შესახებ, რაც მათ შუაღამიდან 02:00 საათამდე (23:00–01:00 GMT) პერიოდში შენიშნეს.

სამი აფეთქების ხმა

აშშ-ის მიერ ირანზე განხორციელებული სამხედრო თავდასხმების გამო, ახლო აღმოსავლეთში აშშ-ის საელჩოები მაღალ მზადყოფნაში იყვნენ გადაყვანილი, ზოგიერთი წარმომადგენლობა კი თავდასხმის სამიზნე გახდა მას შემდეგ, რაც თეირანმა ინდუსტრიულ და დიპლომატიურ ობიექტებზე საპასუხო დარტყმები განახორციელა.

თუმცა, დელემირმა აღნიშნა, რომ ჯერჯერობით არ არსებობს ნიშანი იმისა, რომ ოსლოს საელჩოში მომხდარი შემთხვევა ამ კონფლიქტთანაა დაკავშირებული.

„ჩვენ ამას კონფლიქტს არ ვუკავშირებთ. ამისთვის ჯერ ძალიან ადრეა“, - თქვა მან.

საელჩოს მახლობლად მცხოვრებმა რამდენიმე პირმა ასევე ისაუბრა აფეთქების ხმის გაგონების შესახებ.

16 წლის მოზარდმა, სახელად ედვარდმა, TV2-ს განუცხადა, რომ აფეთქების დროს ტელევიზორს უყურებდა.

„დედაჩემთან ერთად თავიდან ვიფიქრეთ, რომ ხმა ჩვენი სახლიდან მოდიოდა, მიმოვიხედეთ, მაგრამ მერე ფანჯრიდან გარეთ შუქები და ბევრი პოლიციელი დავინახეთ“, - თქვა მან.

„იყვნენ პოლიციის ძაღლები, დრონები, ავტომატური იარაღით შეიარაღებული პოლიციელები და ჰაერში ვერტმფრენები დაფრინავდნენ“, - დასძინა მან.

სამი მეგობრისგან შემდგარმა ჯგუფმა კი აღნიშნა, რომ აფეთქების დროს საელჩოს მახლობლად ტაქსს ელოდნენ.

„აფეთქების სამი ხმა გავიგეთ, რომლებმაც მიწა შეაზანზარა“, - თქვა კრისტიან ვენდელბორგ ეინუნგმა.

ჯგუფმა, რომელმაც ტაქსში ჩაჯდომის შემდეგ შემთხვევის ადგილს ჩაუარა, აღნიშნა, რომ საელჩოს წინ ქუჩა კვამლით იყო დაფარული.

„იქ პოლიციამდე მივედით. კვამლის ფენა ძალიან უცნაური იყო. სქელ ნისლს ჰგავდა“, - თქვა მან.