აშშ-ის პრეზიდენტმა დონალდ ტრამპმა განაცხადა, რომ დიზელის ექსპორტის აკრძალვის ვარიანტს განიხილავს, თუმცა ამას შესაძლოა უარყოფითი გავლენა ჰქონდეს ბენზინის ფასებზე.

დონალდ ტრამპმა თეთრ სახლში მედიის წარმომადგენლების კითხვებს უპასუხა.

კითხვაზე, მიიღო თუ არა გადაწყვეტილება დიზელის ექსპორტის აკრძალვის შესახებ, ტრამპმა თქვა, რომ ამ საკითხს ენერგეტიკის მინისტრ კრის რაიტთან და შინაგან საქმეთა მინისტრ დაგ ბურგუმთან ხშირად განიხილავს.

ტრამპმა აღნიშნა, რომ რაიტისა და ბურგუმის აზრით, ასეთი აკრძალვა დიზელის ფასებს წაადგება, თუმცა შესაძლოა სხვა ზოგიერთი პროდუქტის ფასი გაზარდოს.

აშშ-ის პრეზიდენტმა ტრამპმა განაცხადა: „ვფიქრობ, კარგ მდგომარეობაში ვართ, რადგან ნავთობის ფასები კლებას დაიწყებს. ამჟამად ჰორმუზის სრუტიდან ნავთობის ძალიან დიდი მოცულობა გამოდის.“

ტრამპმა აღნიშნა, რომ დიზელის ფასებთან დაკავშირებული პრობლემა ახლო აღმოსავლეთზე მეტად რუსეთში განვითარებული მოვლენებით არის გამოწვეული.

ტრამპმა თქვა: „რადგან იქ დიზელის გადამამუშავებელი ქარხნები საკმაოდ შემაშფოთებელი სისწრაფით გამოდის მწყობრიდან. ეს რომ არ მომხდარიყო, დიზელის პრობლემა არ გვექნებოდა. რუსეთსა და უკრაინას შორის განვითარებული მოვლენები დიზელის კუთხით ნამდვილად ყველაზე დიდი პრობლემა გახდა.“

აშშ-ის ენერგეტიკის მინისტრმა რაიტმაც აღნიშნა, რომ რუსეთიდან მომავალი დიზელის დაკარგვის გამო მიწოდებაში შეფერხება წარმოიშვა და დასძინა, რომ გარკვეული დანაკარგები ახლო აღმოსავლეთიდან და ჩინეთიდან მომავალ დიზელთან დაკავშირებითაც დაფიქსირდა.

ამერიკის საავტომობილო ასოციაციის (AAA) მონაცემებით, აშშ-ში დიზელის საწვავის საშუალო ფასმა ერთ გალონზე 22 სექტემბერს რეკორდულ 6,53 დოლარს მიაღწია. 30 სექტემბრის მდგომარეობით კი დიზელის საშუალო ფასი ერთ გალონზე 6,41 დოლარად დაფიქსირდა.