ყაზახეთში, კასპიის ზღვის სანაპიროზე გამართული წვრთნების დროს ზღვაში გადავარდნილი 19 სამხედრო მოსამსახურიდან 9 დაიღუპა, 7 კი უგზო-უკვლოდ დაიკარგა.

ყაზახეთის თავდაცვის სამინისტროს მიერ გავრცელებულ განცხადებაში ნათქვამია, რომ ყაზახეთის სამხედრო-საზღვაო ძალები კასპიის ზღვის სანაპიროზე წვრთნებს ატარებდნენ.

განცხადების თანახმად, წვრთნებისას სასწავლო-საბრძოლო დავალების შესრულების დროს, ამინდის პირობების მოულოდნელი გაუარესებისა და ქარის გაძლიერების გამო, 19 სამხედრო ზღვაში გადავარდა.

ინციდენტის შედეგად 9 სამხედრო დაიღუპა, ხოლო 3 გადაარჩინეს. დაკარგული 7 სამხედროს საპოვნელად სამძებრო-სამაშველო სამუშაოები გრძელდება და რეგიონში შესაბამისი დანაყოფებია გაგზავნილი.

მომხდარის ყოველმხრივ გამოძიებისა და სამძებრო-სამაშველო სამუშაოების კოორდინაციის მიზნით, ადგილზე თავდაცვის მინისტრი დაურენ კოსანოვი გაემგზავრა.

მომხდართან დაკავშირებით გამოძიება დაიწყო

ყაზახეთის გენერალურმა პროკურატურამ განაცხადა, რომ სამხედროების დაღუპვის ფაქტზე გამოძიება დაიწყო.

გენერალური პროკურატურის განცხადებით, საქმის გამოძიების მიზნით შეიქმნა ოპერატიულ-საგამოძიებო ჯგუფი და შემთხვევის ადგილზე შინაგან საქმეთა სამინისტროს, საგანგებო სიტუაციების სამინისტროსა და პროკურატურის წარმომადგენლები იმყოფებიან.

განცხადებაში ასევე აღნიშნულია, რომ ტარდება ყველა საჭირო ექსპერტიზა და ჩართულნი არიან სასამართლო ექსპერტები.

პროკურატურის განცხადებაში ნათქვამია, რომ მომხდარის შესწავლისთვის შეიქმნა ოპერატიული საგამოძიებო ჯგუფი და მოვლენას ადგილზე ესწრებიან შინაგან საქმეთა, საგანგებო სიტუაციების სამინისტროსა და პროკურატურის წარმომადგენლები.

განცხადებაში აღნიშნულია ასევე, რომ მიმდინარეობს აუცილებელი შემოწმებები და დანიშნულია სასამართლო ექსპერტები.