ნიუ-იორკმა ოთხშაბათს გამოაცხადა, რომ 2026-27 სასწავლო წლიდან მოსწავლეებისთვის მე-8 კლასის ჩათვლით ხელოვნური ინტელექტის გამოყენებას აკრძალავს.
მერიის განცხადებით, ეს არის აშშ-ში მოსწავლეებზე ორიენტირებული ხელოვნური ინტელექტის ყველაზე მასშტაბური აკრძალვა. პოლიტიკა შეეხება დაახლოებით 600 000 მოსწავლეს - „2-K“ პროგრამიდან (ადრეული განათლების პროგრამა 2 წლის ბავშვებისთვის) მე-8 კლასამდე, სადაც ძირითადად 13-14 წლის მოზარდები სწავლობენ.
„ბავშვებს სწავლისა და განვითარებისთვის მასწავლებლები და ადამიანური ურთიერთობები სჭირდებათ. მათ უნდა განავითარონ უნარები თანატოლებთან ერთად, დაამყარონ ურთიერთობა პედაგოგებთან და დამოუკიდებლად გაუმკლავდნენ რთულ ამოცანებს“, - განაცხადა მერმა ზოჰრან მამდანიმ.
აკრძალვა ვრცელდება ყველა იმ პროგრამულ უზრუნველყოფაზე, რომელიც მოსწავლეებისთვის განკუთვნილ გენერაციულ ხელოვნურ ინტელექტს მოიცავს.
მასწავლებლებს კვლავ შეეძლებათ ხელოვნური ინტელექტის გამოყენება სასწავლო დაგეგმვისა და ოპერაციული დავალებებისთვის, თუ მათ მიერ გამოყენებული აპლიკაციები ნიუ-იორკის საჯარო სკოლების (New York City Public Schools) უსაფრთხოების სტანდარტებს დააკმაყოფილებს.
გამონაკლისი შეიძლება დაუშვან შეზღუდული შესაძლებლობის მქონე მოსწავლეებისთვის, მრავალენოვანი ბავშვებისთვის და იმ მოსწავლეებისთვის, რომლებიც პროფესიული მომზადების პროგრამებში (მაგალითად, კომპიუტერული მეცნიერებები) მონაწილეობენ.
ნიუ-იორკი, სადაც ყოველწლიურად დაახლოებით 900 000 მოსწავლე სწავლობს, აშშ-ის უდიდეს საჯარო სკოლების სისტემას მართავს. ეს შეზღუდვები დაწესდა განათლებაში ხელოვნური ინტელექტის გამოყენების, სწავლის პროცესზე მისი გავლენის, მოსწავლეთა კონფიდენციალურობისა და საკლასო ურთიერთობების შესახებ მიმდინარე დებატების ფონზე.
