ესტონეთის საგარეო საქმეთა სამინისტრომ განაცხადა, რომ გაეროს უშიშროების საბჭო ამ კვირაში საგანგებო სხდომას გამართავს, რაც რუსული თვითმფრინავების მიერ ესტონეთის საჰაერო სივრცის დარღვევას მოჰყვა.

სამმა რუსულმა MiG-31 ტიპის გამანადგურებელმა პარასკევს ფინეთის ყურის გავლით ესტონეთის საჰაერო სივრცე დაარღვია. ეს ფაქტი ევროკავშირისა და ნატოს მხრიდან საშიშ პროვოკაციად შეფასდა, თუმცა მოსკოვმა უარყო.

ნატოს ბალტიის ქვეყნებში საჰაერო თავდაცვის მხარდამჭერი მისიის შემადგენლობაში მყოფი იტალიური F-35 ტიპის გამანადგურებლები შვედურ და ფინურ თვითმფრინავებთან ერთად რუსული თვითმფრინავების შესაჩერებლად და გასაფრთხილებლად აფრინდნენ.

ესტონეთის საგარეო საქმეთა სამინისტროს განცხადებაში ნათქვამია: "22 სექტემბერს... გაეროს უშიშროების საბჭო საგანგებო სხდომას გამართავს, გასულ პარასკევს რუსეთის მიერ ესტონეთის საჰაერო სივრცის აშკარა დარღვევაზე საპასუხოდ".

უკრაინის ძლიერი მხარდამჭერი, ევროკავშირისა და ნატოს წევრი ესტონეთი, გაეროში 34-წლიანი წევრობის შემდეგ, პირველად ითხოვს უშიშროების საბჭოსგან საგანგებო სხდომის გამართვას.

ესტონეთის საგარეო საქმეთა მინისტრმა მარგუს ცახკნამ ხაზგასმით აღნიშნა, რომ დარღვევა არის "რუსეთის მხრიდან დაძაბულობის ესკალაციის ნაწილი როგორც რეგიონულ, ისე გლობალურ დონეზე" და ის მოჰყვა ამ თვის დასაწყისში პოლონეთისა და რუმინეთის საჰაერო სივრცეების დარღვევებს.

ცახკნამ განაცხადა: "ეს ქმედება საერთაშორისო რეაგირებას მოითხოვს".