აშშ-ის პრეზიდენტმა დონალდ ტრამპმა განაცხადა, რომ განცხადება იმის შესახებ, თუ რომელი მსოფლიო ლიდერები შევლენ ღაზის სამშვიდობო საბჭოში, მომავალი წლის დასაწყისში გაკეთდება.
თეთრი სახლის რუზველტის ოთახში გამართული ეკონომიკური ღონისძიების დროს ჟურნალისტებთან საუბრისას ტრამპმა აღნიშნა, რომ საბჭოში შესვლის სურვილი რამდენიმე ლიდერს აქვს. მისი თქმით, საბჭო იმ ღაზის გეგმის ფარგლებში იქმნება, რომელიც აშშ-ის შუამავლობით მომზადდა და რომელმაც ისრაელსა და „ჰამასს“ შორის მყიფე ცეცხლის შეწყვეტა უზრუნველყო.
„ჩვენ ამას მომავალი წლის დასაწყისში გავაკეთებთ და სამშვიდობო საბჭო... ეს იქნება ერთ-ერთი ყველაზე ლეგენდარული საბჭო, რაც კი ოდესმე ყოფილა,“ – განუცხადა ტრამპმა ჟურნალისტებს თეთრ სახლში და დასძინა: „ყველას სურს ამის გაკეთება. ძირითადად, იქ ყველაზე მნიშვნელოვანი ქვეყნების ლიდერები იქნებიან. ყველას სურს (საბჭოში) მონაწილეობა“.
„იარაღის გაყინვა“
„ჰამასმა“ მიანიშნა, რომ ღიაა იარაღის „გაყინვისთვის“, თუმცა უარყო გეგმით გათვალისწინებული სრული განიარაღება.
ალ ჯაზირა-სთან ინტერვიუში „ჰამასის“ მაღალჩინოსანმა ხალიდ მეშალმა განაცხადა: „სრული განიარაღების იდეა წინააღმდეგობის მოძრაობისთვის მიუღებელია. შემოთავაზებულია იარაღის გაყინვა ან დასაწყობება, რათა შეიქმნას გარანტიები ღაზიდან ისრაელის ოკუპაციის წინააღმდეგ ნებისმიერი სამხედრო ესკალაციის თავიდან ასაცილებლად“.
მეშალმა აღნიშნა, რომ შუამავლები განიხილავენ ამ იდეას და „რეალისტური ამერიკული მიდგომით... შესაძლებელია ასეთი ხედვის განხილვა აშშ-ის ადმინისტრაციასთან“.
„ჰამასმა“ განაცხადა, რომ არ იტყვის უარს თავის არსენალზე. „პალესტინელისთვის განიარაღება ნიშნავს მისთვის სულის მთლიანად წართმევას. მოდით, მიზანს სხვა გზით მივაღწიოთ,“ – განაცხადა მეშალმა.
10 ოქტომბრიდან მოქმედმა ცეცხლის შეწყვეტის შეთანხმებამ შეაჩერა ხოცვა-ჟლეტა, რომელიც 2023 წლის ოქტომბერში დაიწყო. შეთანხმება სამი ეტაპისგან შედგება. პირველ ეტაპზე პალესტინურმა წინააღმდეგობის ჯგუფმა აიღო ვალდებულება, დაებრუნებინა ღაზაში მყოფი 48 მძევალი (როგორც ცოცხალი, ისე გარდაცვლილი). ყველა მათგანი გათავისუფლდა; დარჩენილია მხოლოდ ერთი ცხედარი.
ისრაელმა დაახლოებით 2000 პალესტინელი პატიმარი გაათავისუფლა და ასობით პალესტინელის ცხედარი დააბრუნა.
მეშალმა განაცხადა, რომ „ჰამასს“ შეუძლია მიიღოს საერთაშორისო ძალების ყოფნა (სამხრეთ ლიბანში არსებული UNIFIL-ის მსგავსად) ისრაელის საზღვარზე და არა უშუალოდ ღაზაში. მისი თქმით, ღაზის შიგნით ასეთ ყოფნას ისინი „ოკუპაციად“ შეაფასებენ.
