თურქეთისა და ერაყის ხელისუფლებები შეთანხმდნენ სინჯარში სახელმწიფო ხელისუფლების სრულად აღდგენისა და აკრძალული უცხოური შეიარაღებული დაჯგუფებების ყოფნის დასრულების საკითხზე.
პრეზიდენტ რეჯეფ თაიფ ერდოღანის მიერ ერაყის პრემიერ-მინისტრ ალი ალ-ზაიდის მიღებისას მხარეები შეთანხმდნენ უსაფრთხოების სფეროში თანამშრომლობის გაღრმავებაზე.
პრეზიდენტის ადმინისტრაციის კომუნიკაციების დეპარტამენტმა, გაეროს გენერალური ასამბლეის ფარგლებში ნიუ-იორკში მყოფი ერდოღანის მიერ ერაყის პრემიერ-მინისტრის მიღების შემდეგ, „თურქეთ-ერაყის ერთობლივი პრესრელიზი“ გაავრცელა.
აღნიშნული დოკუმენტის თანახმად, მოლაპარაკებებზე, სადაც თურქეთისა და ერაყის ხელისუფლებებმა ორ ქვეყანას შორის სტრატეგიული ურთიერთობები ყველა ასპექტში განიხილეს, მხარეები შეთანხმდნენ უსაფრთხოების სფეროში თანამშრომლობის გაღრმავებაზე. ამ კონტექსტში მიღწეულია შეთანხმება სინჯარში სახელმწიფო ხელისუფლების სრულად აღდგენისა და აკრძალული უცხოური შეიარაღებული დაჯგუფებების ყოფნის დასრულების შესახებ.
ერაყის მიერ უსაფრთხოების ამ ღონისძიებებში მიღწეული პროგრესის გათვალისწინებით, შეთანხმებული მექანიზმისა და ვადების შესაბამისად, თურქული ძალები ბაშიკა-ზილკანის ბაზას ეტაპობრივად გადასცემენ ერაყის ფედერალურ მთავრობას.
მხარეები ასევე შეთანხმდნენ ორმხრივი ვაჭრობისა და ინვესტიციების მოცულობის გაზრდაზე, ხელმოწერილი შეთანხმებების დაუყოვნებლივ ამოქმედებაზე და ერთობლივი სტრატეგიული პროექტების, მათ შორის, „განვითარების გზის“ პროექტის დაჩქარებაზე.
