პრეზიდენტმა ტრამპმა, დანიისა და არქტიკული კუნძულის მოსახლეობის წინააღმდეგობის მიუხედავად, გრენლანდიის მიმართ აშშ-ის ინტერესი კიდევ ერთხელ დააყენა დღის წესრიგში და მიანიშნა, რომ საჭიროების შემთხვევაში შესაძლოა ძალაც გამოიყენოს.
აშშ-ის პრეზიდენტმა დონალდ ტრამპმა განაცხადა, რომ დანიის კუთვნილი გრენლანდიის კონტროლის ხელში ჩასაგდებად საჭიროების შემთხვევაში შესაძლოა სამხედრო ძალა გამოიყენოს.
NBC-ის ეთერში გასულ გადაცემა „Meet the Press“-ში მიცემულ ინტერვიუში ტრამპმა თქვა: „ამ ვარიანტს არ გამოვრიცხავ. არ ვამბობ, რომ ამას გავაკეთებ, მაგრამ არცერთ შესაძლებლობას არ გამოვრიცხავ“.
ტრამპმა განაცხადა, „ჩვენ ნამდვილად გვჭირდება გრენლანდია,“ და დასძინა, რომ დანიის დაქვემდებარებაში მყოფი ავტონომიური რეგიონი „საერთაშორისო უსაფრთხოებისთვის“ აუცილებელია. „გრენლანდიაში ძალიან ცოტა ადამიანი ცხოვრობს, ჩვენ მათ მივხედავთ და ვიზრუნებთ მათზე,“ - დაამატა მან.
იანვარში თანამდებობაზე დაბრუნების შემდეგ, აშშ-ის პრეზიდენტი ტრამპი, დანიის ყველა უარყოფის მიუხედავად, გრენლანდიის შესყიდვის სურვილს ხშირად გამოთქვამს.
სტრატეგიული მნიშვნელობა
გრენლანდია მე-18 საუკუნიდან დანიის სამეფოს ნაწილია და 1979 წელს ავტონომიის უფლება მოიპოვა.
არქტიკისა და ატლანტის ოკეანეებს შორის მდებარე კუნძულს დიდი მნიშვნელობა აქვს როგორც სტრატეგიული მდებარეობის, ასევე წიაღისეული რესურსების თვალსაზრისით.
მეორე მხრივ, როგორც დანიამ, ისე გრენლანდიამ კუნძულის გაყიდვასთან დაკავშირებული ნებისმიერი შეთავაზება კატეგორიულად უარყო. იანვარში ჩატარებულმა გამოკითხვამ აჩვენა, რომ გრენლანდიის მოსახლეობის 85% აშშ-სთან შეერთების წინააღმდეგია.
მარტში კი გრენლანდიის არჩეულმა პრემიერ-მინისტრმა იენს-ფრედერიკ ნილსენმა ევროპის ქვეყნებს მოუწოდა და ხაზგასმით აღნიშნა, რომ კუნძული არ იყიდება.
ნილსენმა სააგენტო „ანადოლუსთვის“ მიცემულ ინტერვიუში განაცხადა: „იყავით ჩვენთან ერთად და ნათლად განაცხადეთ, რომ გრენლანდია არ იყიდება და არასდროს გაიყიდება. გრენლანდიას გრენლანდიელი ხალხი მართავს და ეს არასდროს შეიცვლება“.
