რუსულმა ენერგეტიკულმა კომპანია „გაზპრომმა“ განაცხადა, რომ ევროპის მიწისქვეშა გაზსაცავებში არსებული დეფიციტი ცივი ამინდების პერიოდში საიმედო მიწოდების კუთხით სერიოზულ რისკს ქმნის.

„გაზპრომის“ მიერ გავრცელებულ წერილობით განცხადებაში შეფასებულია ივნისისა და ივლისის პერიოდში ევროპის ბუნებრივი აირის საცავების შევსების მონაცემები.

განცხადებაში აღნიშნულია, რომ საცავებში გაზის დეფიციტმა 12 მილიარდ კუბურ მეტრს მიაღწია და 31 ივლისის მდგომარეობით, გასული წლის იმავე თარიღთან შედარებით, საცავებში 17,3%-ით ნაკლები ბუნებრივი აირია.

განცხადებაში, რომლის მიხედვითაც გერმანიის, ნიდერლანდებისა და საფრანგეთის ბუნებრივი აირის საცავების შევსების მაჩვენებლები ევროპულ საშუალო მაჩვენებელზე დაბალია, ნათქვამია: „არსებული ვითარება ქმნის რისკს ცივი ამინდების პერიოდში ევროპელი მომხმარებლებისთვის ბუნებრივი აირის საიმედო მიწოდების თვალსაზრისით“.

სანქციების გამო „გაზპრომის“ მიერ ევროპაში ბუნებრივი აირის ექსპორტი მნიშვნელოვნად შემცირდა.