ინდონეზიის დედაქალაქ ჯაკარტაში, სკოლის კომპლექსის მეჩეთში მომხდარი აფეთქების შედეგად სულ მცირე 54 ადამიანი დაშავდა. ადგილობრივი პოლიციის უფროსმა, ასეპ ედი სუჰერიმ, განაცხადა, რომ აფეთქების მიზეზი ჯერჯერობით არ არის ცნობილი. ჟურნალისტებთან საუბარში მან აღნიშნა: „ჩვენი პირველადი მონაცემებით, დაახლოებით 54 ადამიანი დაზარალდა. ზოგიერთს მსუბუქი ჭრილობები აქვს, ზოგიერთს საშუალო სიმძიმის, ხოლო ზოგიერთი უკვე გაწერილია.“
პოლიციის ოფიციალურმა წარმომადგენელმა, პრესკონფერენციაზე განაცხადა, რომ აფეთქების მიზეზი იძიება, ხოლო პირველადი შემოწმების შემდეგ განიხილება რამდენიმე შესაძლებლობა, მათ შორის მოკლე ელექტრო ჩართვა, გაუმართავი ელექტრონული მოწყობილობა ან ხელნაკეთი ასაფეთქებელი მოწყობილობა.
Jakarta Globe-ის ინფორმაციით, რომელიც პოლიციის წყაროებს ეფუძნება, აღნიშნული აფეთქება მოხდა ჯაკარტას ჩრდილოეთით მდებარე სახელმწიფო საშუალო სკოლა 72-ის (SMA Negeri 72) მეჩეთში, ადგილობრივი დროით 12:30 საათზე.
ადგილობრივმა მედიამ გაავრცელა კადრები, რომლებიც აჩვენებდნენ სპეციალური პოლიციის დანაყოფის ყოფნას შემთხვევის ადგილზე. ზოგიერთი მედიასაშუალება იუწყებოდა დაშავებულთა განსხვავებულ რაოდენობაზე და აღნიშნავდა, რომ ზოგიერთი მათგანი საავადმყოფოში გადაიყვანეს.
ინციდენტის შემდეგ, ბომბდამშენთა ჯგუფმა ტერიტორიაზე დეტალური შემოწმება ჩაატარა. აღინიშნა, რომ დაზარალებულთა უმეტესობამ მსუბუქი დაზიანებები მიიღო შუშის ნამსხვრევებისა და აფეთქების შოკური ტალღების შედეგად.
სატელევიზიო საინფორმაციო არხებმა, როგორიცაა KompasTV-მ და MetroTV-მ, გაავრცელეს კადრები, სადაც ნაჩვენები იყო პოლიციის კორდონი სკოლის ირგვლივ და სასწრაფო დახმარების მანქანები, რომლებიც მზადყოფნაში იმყოფებოდნენ. მეჩეთის კადრებზე კი დიდი ზიანი არ ჩანდა.
თვითმხილველების განცხადებით, აფეთქება მეჩეთის მთავარი დარბაზის უკანა ნაწილში მოხდა, ხოლო მლოცველები იძულებულნი გახდნენ, უსაფრთხო ადგილას გაქცეულიყვნენ. Jakarta Globe-ის ცნობით, მათემატიკის მასწავლებელმა ბუდი ლაქსონომ განაცხადა: „ქადაგება ახალი დაწყებული იყო, როცა ძლიერი აფეთქების ხმა გავიგონეთ. ოთახი სწრაფად გაივსო კვამლით. მოსწავლეები გარეთ გაიქცნენ - ზოგი ტიროდა, ზოგი პანიკაში მიწაზე დაეცა“.
