თურქეთის კომუნიკაციების დეპარტამენტის ხელმძღვანელმა ბურჰანეთინ დურანმა განაცხადა, რომ შაბათ-კვირას სამხრეთ აფრიკაში გამართულ G20-ის სამიტზე თურქეთმა ხაზი გაუსვა თავის „მტკიცე ერთგულებას“ რეგიონული მშვიდობისა და გლობალური ეკონომიკური სტაბილურობის მიმართ.
კვირას, თურქულ სოციალურ პლატფორმა NSosyal-ზე გამოქვეყნებულ პოსტში, დურანმა აღნიშნა, რომ პრეზიდენტმა რეჯეფ თაიფ ერდოღანმა სამიტის სესიებზე, პრესკონფერენციებსა და მრავალ ორმხრივ შეხვედრაზე ეფექტიანად გააჟღერა ანკარის პოზიციები; ასევე, განიხილა თანამშრომლობა თავდაცვის, ვაჭრობის, ენერგეტიკის, ტექნოლოგიებისა და ავიაციის სფეროებში.
დურანმა ხაზი გაუსვა ქვეყნის მზარდ დიპლომატიურ გავლენას და ერდოღანის აქცენტს ღაზაში არსებულ ჰუმანიტარულ კრიზისსა და გლობალური ქმედების აუცილებლობაზე.
მან ასევე აღნიშნა, რომ ყურადღება გამახვილდა თურქეთის კონსტრუქციულ მიდგომაზე უკრაინა-რუსეთის კონფლიქტთან დაკავშირებით და მოწოდებებზე უფრო ინკლუზიური გლობალური ეკონომიკისკენ.
თურქეთი COP31-ს უმასპინძლებს
სამომავლო გეგმებზე საუბრისას, დურანმა მიუთითა, რომ მომავალ ნოემბერში თურქეთი გაეროს კლიმატის ცვლილების კონფერენციას - COP31-ს უხელმძღვანელებს და მასპინძლობას გაუწევს.
მან განაცხადა, რომ თურქეთი კლიმატის დაცვის კუთხით ერთ-ერთი წამყვანი აქტორია; ხოლო ისეთი ინიციატივები, როგორიცაა „2053 წლის ნულოვანი ემისიის მიზანი“ და „ნულოვანი ნარჩენების მოძრაობა“, აჩვენებს ქვეყნის ერთგულებას მდგრადი განვითარებისადმი.
ბურჰანეთინ დურანმა განაცხადა: „ჩვენი პრეზიდენტის, რეჯეფ თაიფ ერდოღანის მიერ გამოცხადებული „2053 წლის ნულოვანი ემისიის მიზანი“ მსოფლიოს უჩვენებს განვითარების ისეთ მიდგომას, რომელიც ითვალისწინებს არა მხოლოდ დღევანდელ დღეს, არამედ მომავალსაც. ეს ხედვა, რომელიც პრიორიტეტს ანიჭებს მწვანე ტრანსფორმაციას პოლიტიკის ყველა სფეროში - ენერგეტიკიდან ტრანსპორტამდე, ქალაქგეგმარებიდან წარმოებამდე - ქმნის ლიდერობის მყარ საფუძველს COP31-ის პროცესისთვის“.
დურანმა ასევე აღნიშნა: „ნულოვანი ნარჩენების ინიციატივა, რომელიც პრეზიდენტის მეუღლის, ემინე ერდოღანის პატრონაჟით გლობალურ გარემოსდაცვით მოძრაობად იქცა, უფრო სიცოცხლისუნარიანი მსოფლიოსთვის ერთ-ერთი ყველაზე შთამაგონებელი წარმატების ისტორიაა. ნარჩენების შემცირება, რესურსების ეფექტიანი გამოყენება და ბუნების პატივისცემაზე დამყარებული ცხოვრების კულტურის წახალისება არის ის მიზნები, რომლებიც სრულად ემთხვევა COP31-ის სულისკვეთებას“.
თურქეთის რესპუბლიკის კომუნიკაციების დეპარტამენტის ხელმძღვანელმა ბურჰანეთინ დურანმა დასძინა: „მჯერა, რომ ჩვენს ქვეყანაში ეს ისტორიული შეხვედრა იქნება პროცესი, სადაც კლიმატის დიპლომატიის გული ანატოლიაში იძგერებს და გლობალური გადაწყვეტილებები თურქეთიდან გაჟღერდება“.
