პრეზიდენტმა ერდოღანმა ბოსნია-ჰერცეგოვინის პრეზიდიუმის თავმჯდომარე ბეჩიროვიჩი მიიღო
თურქეთის რესპუბლიკის პრეზიდენტმა ერდოღანმა სტამბოლში ბოსნია-ჰერცეგოვინის პრეზიდიუმის თავმჯდომარეს, ბეჩიროვიჩს უმასპინძლა და კიდევ ერთხელ დაადასტურა თურქეთის მტკიცე მხარდაჭერა ბოსნიის სუვერენიტეტისა და ტერიტორიული მთლიანობის მიმართ.
თურქეთის პრეზიდენტმა რეჯეფ თაიფ ერდოღანმა ოფიციალური ცერემონიით მიიღო ბოსნია-ჰერცეგოვინის პრეზიდიუმის თავმჯდომარე დენის ბეჩიროვიჩი, რომელიც თურქეთს ოფიციალური ვიზიტით ეწვია.
დახვედრის ცერემონია სტამბოლში, დოლმაბაჰჩეს პრეზიდენტის სამუშაო ოფისში გაიმართა. ცერემონიის შემდეგ პირისპირი შეხვედრა შედგა.
თურქეთის პრეზიდენტის ადმინისტრაციის კომუნიკაციების სამმართველოს მიერ თურქულ სოციალურ პლატფორმა NSosyal-ზე გავრცელებულ განცხადებაში აღნიშნულია, რომ მხარეებმა რეგიონული საკითხები და თურქეთსა და ბოსნია-ჰერცეგოვინას შორის არსებული ურთიერთობები განიხილეს.
შეხვედრისას ერდოღანმა განაცხადა, რომ თურქეთი კვლავაც უპირობო მხარდაჭერას გაუწევს ბოსნია-ჰერცეგოვინის სუვერენიტეტს, ტერიტორიულ მთლიანობასა და კონსტიტუციურ წესრიგს.
ერდოღანმა ხაზგასმით აღნიშნა, რომ რეგიონს მეტი ავანტიურიზმისთვის რესურსი არ გააჩნია და დასძინა, რომ ბოსნია-ჰერცეგოვინის ერთიანობის წინააღმდეგ მიმართული პროვოკაციული რიტორიკა არავისთვის იქნება სარგებლის მომტანი.
ერდოღანმა ხაზი გაუსვა, რომ ბოსნია-ჰერცეგოვინის მთლიანობის მხარდამჭერთა ერთიანობა ახლა უფრო მნიშვნელოვანია, ვიდრე ოდესმე; მან ასევე დასძინა, რომ თურქეთისთვის მიუღებელია ნებისმიერი ქმედება, რომელიც ბოსნიელების სასიცოცხლო ინტერესებს დაარღვევს და მათ ფაქტის წინაშე დააყენებს.
ბოსნია-ჰერცეგოვინის პრეზიდიუმი სამი წევრისგან შედგება: ერთი ბოსნიელი, ერთი ხორვატი და ერთი სერბი.
პრეზიდიუმის ბოსნიელმა წევრმა, ბეჩიროვიჩმა, თავმჯდომარის პოსტი ამ თვეში დაიკავა.