ხუთშაბათს ურტასუნმა ხაზგასმით აღნიშნა, რომ ევროკავშირში სულ უფრო ძლიერდება მოსაზრება, რომ ირანზე აშშ-ისა და ისრაელის თავდასხმების ფონზე აშშ-ის პრეზიდენტ დონალდ ტრამპისადმი მოწოდებების გაგრძელება „სრულიად უსარგებლოა“.

მინისტრმა ტელეკომპანია Channel 4-ს განუცხადა: „ვფიქრობ, ევროკავშირის დონეზე იზრდება განცდა, რომ დონალდ ტრამპის ამპარტავნებაზე ან პირად ინტერესებზე მიმართვის გაგრძელება სრულიად უსარგებლოა. მოკლედ, ეს საქმე დასრულებულია“.

ურტასუნმა ხაზგასმით აღნიშნა, რომ ისინი არ აპირებენ საკუთარი ღირებულებებისა და ინტერესების „დაკნინებას“ მხოლოდ იმისთვის, რომ „დონალდ ტრამპი ასიამოვნონ“.

კითხვაზე, თუ რატომ ეწინააღმდეგება მადრიდი ვაშინგტონის თავდასხმას ირანზე, ესპანელმა მინისტრმა უპასუხა: „მიმაჩნია, რომ დადგა მომენტი, როდესაც დემოკრატიული ქვეყნები, რომლებსაც საერთაშორისო სამართლისა და მულტილატერალიზმის (მრავალმხრივობის) სჯერათ, ფეხზე უნდა დადგნენ. სხვა გზა არ არსებობს“. მან ასევე დასძინა, რომ საერთაშორისო სამართლის განმეორებითი დარღვევებისა და მისი უგულებელყოფის უბრალოდ შეგუების შემთხვევაში, უნდა დავსვათ კითხვა: „როგორი ტიპის სამყაროს ვაშენებთ 21-ე საუკუნეში?“

„რაღაც მომენტში უნდა ვთქვათ „არა“. უნდა ვთქვათ „გაჩერდით“, - განაცხადა ურტასუნმა. მან ასევე გაიმეორა, რომ ესპანეთს არ ეშინია ვაშინგტონის სავაჭრო მუქარების და აღნიშნა, რომ ასეთი მუქარების სერიოზულად მიღება „ძალიან რთულია“.

„ამჟამად, როგორც ესპანეთის მთავრობა, მოვუწოდებთ მხარეებს დეესკალაციისკენ, სხვადასხვა სამხედრო მოქმედებების შეწყვეტისა და მოლაპარაკებებისა და დიალოგის განახლებისკენ. ეს არის ჩვენი მიზანი“, - განმარტა მინისტრმა.

მინისტრის ეს სიტყვები მოჰყვა ვაშინგტონის განცხადებებს ესპანეთისთვის სრული სავაჭრო ემბარგოს დაწესების მუქარის შესახებ. ორ ქვეყანას შორის დაძაბულობა მას შემდეგ გამწვავდა, რაც ესპანეთის მთავრობამ უარი თქვა აშშ-ის არმიისთვის ნება დაერთო, გამოეყენებინა ქვეყნის ტერიტორიაზე არსებული ბაზები ირანზე თავდასხმების განსახორციელებლად.