ირანის საგარეო საქმეთა მინისტრი აბას არაღჩი აშშ-ს შრი-ლანკის სანაპიროსთან ირანული სამხედრო გემის ჩაძირვით ჩადენილ „სასტიკ ქმედებაში“ ადანაშაულებს და აფრთხილებს, რომ შექმნილი პრეცედენტის გამო აშშ „მწარედ ინანებს“.
არაღჩიმ სოციალურ ქსელ X-ში დაწერა: „აშშ-მა ირანის სანაპიროდან 2000 მილის დაშორებით, ზღვაში, სისასტიკე ჩაიდინა. ფრეგატ „დენას“, რომელიც ინდოეთის სამხედრო-საზღვაო ძალების სტუმარი იყო და დაახლოებით 130 მეზღვაური გადაჰყავდა, საერთაშორისო წყლებში ყოველგვარი გაფრთხილების გარეშე დაარტყეს“.
„დაიმახსოვრეთ ჩემი სიტყვები: აშშ მწარედ გადაიხდის იმ პრეცედენტის გამო, რომელიც თავადვე შექმნა“, - დასძინა მან.
„ჩუმი სიკვდილი“
ირანელი მინისტრის განცხადება მოჰყვა აშშ-ის ოფიციალური პირების მიერ იმ ფაქტის დადასტურებას, რომ ამერიკულმა წყალქვეშა ნავმა ინდოეთის ოკეანეში ირანული ფრეგატი IRIS Dena ჩაძირა; მათ ეს ვაშინგტონის მიერ ირანის წინააღმდეგ გაფართოებული ომის ნაწილად შეაფასეს.
აშშ-ის თავდაცვის მდივანმა პიტ ჰეგსეთმა მომხდარს „ჩუმი სიკვდილი“ უწოდა და აღნიშნა, რომ ეს თავდასხმა ამერიკული ძალების მოქმედების არეალის მასშტაბურობას უსვამს ხაზს. მან ასევე დასძინა, რომ გემის ეკიპაჟი თავს საერთაშორისო წყლებში უსაფრთხოდ მიიჩნევდა.
შრი-ლანკის ოფიციალურმა პირებმა განაცხადეს, რომ გემმა დახმარების სიგნალი ოთხშაბათს დილით, საპორტო ქალაქ გალედან სამხრეთით, დაახლოებით 40 კილომეტრში გასცა.
მაშველებმა ეკიპაჟის 32 წევრი გადაარჩინეს, თუმცა ათობით ადამიანი დაკარგულად ითვლება და ოფიციალური პირები შიშობენ, რომ სულ მცირე 80 მეზღვაური დაიღუპა.
შრი-ლანკელი მაღალჩინოსნების თქმით, როდესაც მაშველები შემთხვევის ადგილზე მივიდნენ, გემი უკვე სრულად იყო ჩაძირული და მხოლოდ ნავთობის ლაქა მოჩანდა. სამძებრო სამუშაოებს საავიაციო საშუალებები და საპატრულო კატარღები აგრძელებენ.
შრი-ლანკამ, რომელმაც ახლო აღმოსავლეთის კონფლიქტში ნეიტრალიტეტი გამოაცხადა, აღნიშნა, რომ დახმარების სიგნალზე რეაგირება საერთაშორისო საზღვაო ვალდებულებების შესაბამისად მოახდინა.
