თურქეთის პრეზიდენტი რეჯეფ თაიფ ერდოღანი, შანხაის თანამშრომლობის ორგანიზაციის სახელმწიფო მეთაურთა სამიტის ფარგლებში, ყირგიზეთის დედაქალაქ ბიშკეკში თავის რუს კოლეგას, ვლადიმერ პუტინს, „ალა არჩას“ სახელმწიფო რეზიდენციაში შეხვდა.

შეხვედრისას ვლადიმერ პუტინმა აღნიშნა, რომ თურქეთი საგარეო პოლიტიკისა და ეკონომიკის სფეროებში ერთ-ერთი პრივილეგირებული პარტნიორია: „ერთობლივი პროექტების განხორციელება გრძელდება. ერთ-ერთი მათგანია აქქუიუს ატომური ელექტროსადგური. თქვენ მიზნად დაისახეთ სადგურის პირველი ბლოკის წელს ექსპლუატაციაში გაშვება. ასეც მოხდება“, - განაცხადა მან.

პუტინმა ასევე ხაზი გაუსვა თურქეთთან კულტურულ და ჰუმანიტარულ სფეროებში თანამშრომლობის მაღალ პოტენციალს: „რუსი ტურისტების ნაკადი თურქეთში იზრდება. გასულ წელს თურქეთს 7 მილიონამდე რუსი ტურისტი ეწვია“.

პრეზიდენტმა ერდოღანმა კი აღნიშნა: „თურქეთ-რუსეთის ურთიერთობები დღეს, ნებისმიერ სხვა პერიოდთან შედარებით, გაცილებით მაღალ დონეზეა. რუსი ტურისტების მნიშვნელობა თურქეთისთვის განსაკუთრებულია. დღეს ჩვენი ანტალიის პროვინციის ყველაზე მნიშვნელოვან ტურისტულ ნაკადს სწორედ რუსეთიდან ჩამოსული მეგობრები ქმნიან. ამასთან ერთად, როგორც ბატონმა პრეზიდენტმა უკვე აღნიშნა, თურქეთ-რუსეთის ურთიერთობებში აქქუიუს ატომურ ელექტროსადგურს უდიდესი მნიშვნელობა აქვს. ჩვენ ასევე გვაქვს ძლიერი პარტნიორობა სოფლის მეურნეობისა და ენერგეტიკის სფეროებში“.