აშშ-ის პრეზიდენტმა დონალდ ტრამპმა განაცხადა, რომ ირანთან ომის დამსრულებელი შეთანხმება კვირას გაფორმდებოდა. თუმცა, ირანმა ტრამპის განცხადება უარყო და აღნიშნა, რომ ამ დღეს არანაირი ხელმოწერა არ იგეგმება.
ტრამპმა ასევე აღნიშნა, რომ რეგიონში ვითარების დამშვიდების შემდეგ, აშშ ირანის გამდიდრებულ ურანს იპოვიდა და გაანადგურებდა.
შაბათს, პლატფორმა Truth Social-ზე გამოქვეყნებულ პოსტში ტრამპმა განაცხადა: „შესაფერის დროს, როცა ყველაფერი დაწყნარდება, ჩვენი მშვენიერი B-2 ბომბდამშენებითა და საუკეთესო პილოტების დახმარებით, ავიღებთ ბირთვულ ნივთიერებას, რომელიც მძლავრი გრანიტის მთების სიღრმეშია დამარხული. ირანში იქნება თუ აშშ-ში, ჩვენ მას დაბალ დონეზე გავამდიდრებთ და გავანადგურებთ“.
ტრამპმა აღნიშნა, რომ ირანთან შეთანხმების ხელმოწერა იგეგმება და ხელმოწერისთანავე ჰორმუზის სრუტე „ყველასთვის გაიხსნება“.
ტრამპმა თქვა: „შეთანხმების ხელმოწერა ხვალ იგეგმება. ხელმოწერისთანავე ჰორმუზის სრუტე ყველასთვის გაიხსნება“.
ირანმა კი განმარტა, რომ აშშ-სთან ურთიერთგაგების მემორანდუმი კვირას არ გაფორმდება, თუმცა ხელმოწერა შესაძლოა უახლოეს დღეებში შედგეს.
ირანის საგარეო საქმეთა სამინისტროს სპიკერმა ისმაილ ბეყაიმ განაცხადა, რომ ისლამაბადის მემორანდუმი ფოკუსირებულია ომის დასრულებაზე ყველა ფრონტზე, მათ შორის ლიბანში, ხოლო ბირთვული საკითხი ამ ეტაპზე არ განიხილება.
ტრამპმა კი ამტკიცა, რომ თეირანს ბირთვული იარაღი აღარ სურს.
სააგენტო Tasnim-ის ინფორმაციით, ბეყაიმ თქვა: „უნდა დაველოდოთ, ზუსტად როდის მოეწერება ხელი მემორანდუმს. ხვალ ხელი არ მოეწერება, თუმცა უახლოეს დღეებში ხელმოწერის შესაძლებლობა არ გამოირიცხება“.
