ევროპული საბჭოს პრეზიდენტი ანტონიუ კოშტა და ევროკომისიის პრეზიდენტი ურსულა ფონ დერ ლაიენი ნიუ-იორკში, გაეროს გენერალური ასამბლეის ფარგლებში, სირიის პრეზიდენტ აჰმედ შარას შეხვდნენ.
სამშაბათს X პლატფორმაზე გამოქვეყნებულ ერთობლივ განცხადებაში ევროკავშირის ლიდერებმა აღნიშნეს, რომ შარასთან "კარგი შეხვედრა" ჰქონდათ სირიის გარდამავალ პერიოდში არსებული სირთულეების შესახებ.
განცხადებაში მათ კიდევ ერთხელ დაადასტურეს ბლოკის მხარდაჭერა "ნამდვილი, ინკლუზიური, მშვიდობიანი და სირიის ხელმძღვანელობით გარდამავალი პროცესისთვის, ყოველგვარი საზიანო გარე ჩარევის გარეშე".
"ჩვენ მზად ვართ გავაძლიეროთ პოლიტიკური დიალოგი, დავაკმაყოფილოთ გადაუდებელი ჰუმანიტარული საჭიროებები და მხარი დავუჭიროთ სირიის სოციალურ-ეკონომიკურ აღდგენასა და რეკონსტრუქციას", - ნათქვამია განცხადებაში.
დაახლოებით 25 წლის განმავლობაში სირიის რეჟიმის ლიდერი, ბაშარ ალ-ასადი, გასული წლის დეკემბერში რუსეთში გაიქცა, რითაც დასრულდა 1963 წლიდან ხელისუფლებაში მყოფი პარტია “ბაასის” რეჟიმი. იანვარში აჰმედ შარას ხელმძღვანელობით ახალი გარდამავალი მთავრობა შეიქმნა.
ასადის გადაყენების შემდეგ, სირიის ახალი ადმინისტრაცია ფოკუსირებულია პოლიტიკური და ეკონომიკური რეფორმების განხორციელებაზე, სოციალური ჰარმონიის ხელშეწყობაზე და რეგიონულ და საერთაშორისო პარტნიორებთან თანამშრომლობის გაფართოებაზე.
