თურქეთი უმასპინძლებს პაკისტანსა და ავღანეთს შორის მოლაპარაკებების მეორე რაუნდს სტამბოლში. პაკისტანის საგარეო საქმეთა სამინისტრომ და ავღანეთის ოფიციალურმა პირებმა განაცხადეს, რომ შეხვედრა შაბათს გაიმართება.

პაკისტანის საგარეო საქმეთა მინისტრის პრესსპიკერმა, ტაჰირ ჰუსეინ ანდრაბიმ, დედაქალაქ ისლამაბადში ჟურნალისტებთან საუბრისას განაცხადა, რომ მოლაპარაკებების მიზანია „საზღვრისპირა ტერორიზმის თავიდან ასაცილებლად კონკრეტული და გადამოწმებადი მონიტორინგის მექანიზმის შექმნა“.

„ჩვენ მივესალმებით 2025 წლის 19 ოქტომბერს კატარის დედაქალაქ დოჰაში პაკისტანსა და ავღანეთს შორის მიღწეულ შეთანხმებას, როგორც პირველ ნაბიჯს რეგიონული მშვიდობისა და სტაბილურობის უზრუნველყოფის გზაზე“, - განაცხადა ანდრაბიმ.

„პაკისტანი ასევე ელოდება კონკრეტული და გადამოწმებადი მონიტორინგის მექანიზმის შექმნას მომდევნო შეხვედრაზე, რომელსაც თურქეთი უმასპინძლებს 2025 წლის 25 ოქტომბერს სტამბოლში, რათა თავიდან იქნას აცილებული ავღანეთის ტერიტორიიდან პაკისტანისკენ მომავალი ტერორისტული საფრთხე და პაკისტანელთა დაღუპვა“, - დასძინა მან.

ქაბულის ადმინისტრაციამ ასევე დაადასტურა სტამბოლში დაგეგმილი შეხვედრა.

ავღანეთის დროებითი მთავრობის პრესსპიკერმა, ზაბიჰულა მუჯაჰიდმა განაცხადა, რომ მათ დელეგაციას შინაგან საქმეთა მინისტრის მოადგილე მავლავი რაჰმათულა ნაჯიბი ხელმძღვანელობს. X პლატფორმაზე მუჯაჰიდმა განაცხადა, რომ „პაკისტანთან დარჩენილი საკითხები შეხვედრაზე განიხილება“ და დასძინა, რომ ავღანეთის დელეგაცია ქაბულიდან სტამბოლში გაემგზავრა.

მრავალდღიანი სისხლიანი სასაზღვრო შეტაკებების შემდეგ, გასულ კვირას კატარისა და თურქეთის შუამავლობით დოჰაში გამართულ მოლაპარაკებებზე ორივე მხარე ცეცხლის შეწყვეტაზე შეთანხმდა; ეს ზავი კვლავ ძალაშია.

პაკისტანის საგარეო საქმეთა სამინისტროს პრესსპიკერმა ანდრაბიმ ასევე გამოხატა ღრმა მადლიერება კატარისა და თურქეთის მიმართ დიალოგის პროცესის ხელშეწყობაში შეტანილი „კონსტრუქციული როლისთვის“.