ირანის გაღრმავებული ეკონომიკური პრობლემების წინააღმდეგ გამართულ პროტესტებს ფატალური შედეგები მოჰყვა. ქვეყნის დასავლეთ ნაწილში მომხდარ შეტაკებებში მინიმუმ ექვსი ადამიანი დაიღუპა.
აქციები კვირას დედაქალაქ თეირანში დაიწყო; მოვაჭრეები გაიფიცნენ ფასების ზრდისა და ხანგრძლივი ეკონომიკური სტაგნაციის გასაპროტესტებლად. მას შემდეგ პროტესტი ბევრ სხვა ქალაქშიც გავრცელდა და მასში სტუდენტები და სხვა ჯგუფებიც ჩაერთნენ.
ირანის საინფორმაციო სააგენტო „Fars“-მა ხუთშაბათს განაცხადა, რომ ჩაჰარმაჰალისა და ბახტიარიის პროვინციის ქალაქ ლორდეგანში უსაფრთხოების ძალებსა და მომიტინგეებს შორის შეტაკებისას ორი ადამიანი დაიღუპა, ხოლო მეზობელ ლურისტანის პროვინციის ქალაქ აზნაში - სამი.
ამავე სააგენტოს ცნობით, პოლიციამ დემონსტრაციების დასაშლელად ცრემლსადენი გაზი გამოიყენა, დაკავებულია რამდენიმე პირი, რომლებსაც ხელისუფლება აქციების „ორგანიზატორებად“ მოიხსენიებს. შეტაკებების დროს მძიმედ დაზიანდა არაერთი შენობა.
ირანის სახელმწიფო ტელევიზიამ ხუთშაბათს დილით გაავრცელა ინფორმაცია, რომ დასავლეთ ირანის ქალაქ ქუჰდეშტში ღამის განმავლობაში მომხდარი მოვლენების დროს უსაფრთხოების ძალების ერთი წევრი დაიღუპა.
დადგინდა, რომ დაღუპული იყო „ბასიჯის“ (მოხალისეთა მილიციის ორგანიზაცია, რომელიც ხომეინიმ 1979 წლის რევოლუციის შემდეგ დააარსა) 21 წლის წევრი. ლურისტანის პროვინციის ვიცე-გუბერნატორმა, საიდ ფურალიმ განაცხადა, რომ ქუჰდეშტის პროტესტის დროს ქვების სროლის შედეგად 13 პოლიციელი და „ბასიჯის“ წევრი დაშავდა.
ირანში დაძაბულობა კვლავ იმატებს
პრეზიდენტი მასუდ ფეზეშქიანი შეეცადა დაძაბულობის განმუხტვას - მან აღიარა მომიტინგეების „ლეგიტიმური მოთხოვნები“ და მოუწოდა მთავრობას, იპოვონ ეკონომიკური სირთულეების გადაჭრის გზები.
ხელისუფლებამ ასევე გააფრთხილა მოსახლეობა ეკონომიკური უკმაყოფილების ქვეყნის დესტაბილიზაციისთვის გამოყენების მცდელობის წინააღმდეგ და აღნიშნა, რომ ძალადობას გადამჭრელ პასუხს გასცემენ.
ირანის გენერალურმა პროკურორმა განაცხადა, რომ მშვიდობიანი ეკონომიკური პროტესტი ლეგიტიმურია, თუმცა მათ მიმართ, ვინც ძალადობას მიმართავს ან სახელმწიფო ქონებას აზიანებს, „მკაცრი ზომები“ იქნება მიღებული.
სახელმწიფო საინფორმაციო სააგენტო „Tasnim“-ის ცნობით, დაკავებულია შვიდი პირი, რომლებიც, სავარაუდოდ, დაკავშირებულნი არიან აშშ-სა და ევროპაში მყოფ „ირანის მტრულ“ ჯგუფებთან; მათ ბრალად ედებათ აქციების ძალადობრივ ქმედებებად გადაქცევის მცდელობა.
ირანულმა ვალუტამ, რიალმა, ბოლო ერთ წელიწადში აშშ დოლართან მიმართებით ღირებულების მესამედზე მეტი დაკარგა, ხოლო ინფლაცია კვლავ აუფასურებს მოსახლეობის მსყიდველობით უნარს.
