თურქეთი მიესალმა ერაყის ქალაქ ქირქუქში თურქმენი გუბერნატორის დანიშვნას და ეს ფაქტი ისტორიულ ნაბიჯად შეაფასა კულტურულად მრავალფეროვან რეგიონში ინკლუზიურობისა და წარმომადგენლობითი სამართლიანობის კუთხით.
საგარეო საქმეთა სამინისტრომ თავის განცხადებაში აღნიშნა, რომ ერაყის თურქმენთა ფრონტის თავმჯდომარემ, მეჰმეთ სემან აღაოღლუმ, ორშაბათს ერაყის პრეზიდენტისგან მანდატი მიიღო და ოფიციალურად შეუდგა ქირქუქის გუბერნატორის მოვალეობის შესრულებას. აღაოღლუ ქირქუქის პროვინციულმა საბჭომ გუბერნატორად 16 აპრილს აირჩია.
სამინისტრომ ხაზგასმით აღნიშნა, რომ „კულტურული მრავალფეროვნებისა და პლურალისტური სტრუქტურის მქონე ქირქუქში თურქმენი გუბერნატორის არჩევა არის უაღრესად მნიშვნელოვანი და ისტორიული მოვლენა ინკლუზიურობის, წარმომადგენლობითი სამართლიანობისა და სოციალური მშვიდობის განმტკიცების მხრივ“.
უწყებამ განმარტა, რომ აღნიშნული დანიშვნა არის „თურქმენი თანამემამულეების - ერაყისა და ქირქუქის ძირძველი შემადგენელი ნაწილის - ლეგიტიმური უფლების დაგვიანებული აღდგენა“.
სამინისტროს განცხადებაში ასევე ნათქვამია: „ქირქუქში მაღალი დონის ადმინისტრაციული პოსტების როტაციული პრინციპით განაწილება ეთნოსებს შორის კონსენსუსის საფუძველზე, სამართლიანი და თანასწორი მონაპოვარია არა მხოლოდ თურქმენებისთვის, არამედ ქირქუქის ყველა შემადგენელი ელემენტისთვის“.
ანკარამ გამოთქვა იმედი, რომ ეს გადაწყვეტილება ხელს შეუწყობს ერაყისა და ქირქუქის ხალხის მშვიდობას, უსაფრთხოებასა და კეთილდღეობას, რაც თავის მხრივ დადებით გავლენას მოახდენს ერაყის ზოგად სტაბილურობაზე.
