ტრამპი თეთრ სახლში ნიუ-იორკის ახლადარჩეულ მერს, მამდანის შეხვდება

აშშ-ის პრეზიდენტმა დონალდ ტრამპმა განაცხადა, რომ პარასკევს თეთრ სახლში ნიუ-იორკის ახლადარჩეულ მერს, ზოჰრან მამდანის შეხვდება.

ტრამპმა ოთხშაბათს საღამოს სოციალურ მედია პლატფორმა Truth Social-ზე დაწერა: „ნიუ-იორკის კომუნისტმა მერმა, ზოჰრან ‘კვამე’ მამდანიმ ჩემთან შეხვედრა ითხოვა. ჩვენ შევთანხმდით, რომ ეს შეხვედრა პარასკევს, 21 ნოემბერს, ოვალურ კაბინეტში გაიმართება. დეტალები მოგვიანებით გახდება ცნობილი!“

მამდანიმ, რომელიც ქვეყნის უდიდესი ქალაქის პირველი მუსლიმი და სამხრეთაზიელი მერია, ამ თვეში ჩატარებულ არჩევნებში პროგრესული კამპანია აწარმოა, რომელიც ცხოვრების ხარჯების ხელმისაწვდომობასა და სოციალურ სერვისებზე იყო ფოკუსირებული. ამ კამპანიით მან ყოფილი გუბერნატორი ენდრიუ კუომო და რესპუბლიკელი კერტის სლივა დაამარცხა.

ნიუ-იორკის წინასაარჩევნო კამპანიის განმავლობაში ტრამპი არაერთხელ დაესხა თავს 34 წლის დემოკრატ სოციალისტ მამდანის; მას „კომუნისტი“ უწოდა, მხარი დაუჭირა კუომოს და გააფრთხილა, რომ მამდანის გამარჯვების შემთხვევაში, ნიუ-იორკისთვის განკუთვნილი ფედერალური სახსრები შესაძლოა შეემცირებინა.

გამოსავლის ძიება

ტრამპმა ასევე უსაფუძვლოდ მიანიშნა, რომ შეეძლო მამდანის დეპორტაცია, რომელიც უგანდაშია დაბადებული და აშშ-ის მოქალაქეობა 2018 წელს მიიღო.

მოგვიანებით ტრამპმა თქვა, რომ მათ ერთად „გამოსავლის პოვნა შეუძლიათ“. ეს განცხადება, რომელიც დამოკიდებულების შეცვლაზე მიუთითებდა, მას შემდეგ გაკეთდა, რაც რესპუბლიკელებმა რამდენიმე შტატში საარჩევნო მარცხი განიცადეს და მამდანიმ თავისი კამპანიის მთავარ თემაზე - ხელმისაწვდომობაზე - დაიწყო აქცენტირება.

ამ თვის დასაწყისში გამოქვეყნებულ განცხადებაში მამდანიმ აღნიშნა, რომ ტრამპთან საუბრის სურვილი ჰქონდა, თუმცა უარს იტყოდა ნებისმიერ ისეთ მოლაპარაკებაზე, რომელიც „ნიუ-იორკელებს ზიანს მიაყენებდა“.

მამდანის გუნდმა დაადასტურა, რომ ტრამპთან შეხვედრის დასაგეგმად ადმინისტრაციასთან კონტაქტი დაამყარეს.

ტრამპის მიერ ოთხშაბათს გავრცელებულმა მეორე განცხადებამ დაგეგმილი შეხვედრა დაადასტურა, სადაც მან მამდანის სრული სახელი გამოიყენა და სახელი „კვამე“ ბრჭყალებში მოიხსენია.

ტრამპმა შეხვედრას „დიდი ხნის ნანატრი“ უწოდა და მიანიშნა, რომ ეს შესაძლოა დაძაბულობის განმუხტვის მომენტი იყოს.

მამდანიმ, რომელიც ოფიციალურად მოვალეობის შესრულებას იანვარში შეუდგება, გამარჯვების აღსანიშნავ სიტყვაში განაცხადა, რომ სურდა ეჩვენებინა, „როგორ უნდა დაამარცხო ქვეყნის პრეზიდენტი“.

მამდანიმ თანამდებობის დაკავების შემდეგ ნიუ-იორკის „ტრამპის გავლენისგან დაცვის“ იდეაზე ისაუბრა და ხაზგასმით აღნიშნა, რომ თუ ეს ნიუ-იორკელებისთვის სასარგებლო იქნება, მზადაა ითანამშრომლოს ყველასთან, მათ შორის პრეზიდენტთანაც.