ორშაბათს თურქეთმა დაგმო ისრაელის მიერ საერთაშორისო წყლებში ღაზისკენ მიმავალი „გლობალური სუმუდის“ ჰუმანიტარული ფლოტილიის შეჩერება და მას „მეკობრეობის ახალი აქტი“ უწოდა.
თურქეთის საგარეო საქმეთა სამინისტროს მიერ გავრცელებულ განცხადებაში ნათქვამია, რომ ისრაელის ძალებმა ჩაატარეს ოპერაცია ფლოტილიის წინააღმდეგ, რომელსაც ღაზაში ჰუმანიტარული ტვირთი გადაჰქონდა.
სამინისტროს განცხადებაში ნათქვამია: „ჩვენ ვგმობთ ისრაელის ძალების მიერ საერთაშორისო წყლებში განხორციელებულ ჩარევას „გლობალური სუმუდის“ ფლოტილიის წინააღმდეგ, რომელიც ღაზაში ჰუმანიტარული დახმარების მიწოდების მიზნით შეიქმნა, და ამას ვაფასებთ როგორც მეკობრეობის ახალ აქტს“.
განცხადებაში აღნიშნულია, რომ ფლოტილიაში დაახლოებით 40 ქვეყნის მოქალაქე იმყოფებოდა და ხაზგასმულია, რომ ისრაელის „თავდასხმისა და დაშინების პოლიტიკა“ ვერ შეაფერხებს საერთაშორისო სოლიდარობას პალესტინელი ხალხის მიმართ.
სამინისტრომ ასევე მოუწოდა ისრაელს, დაუყოვნებლივ შეწყვიტოს მსგავსი ქმედებები და უპირობოდ გაათავისუფლოს დაკავებული მონაწილეები.
თურქული მხარის განცხადებით, შესაბამისი უწყებები ახორციელებენ საჭირო ღონისძიებებს ფლოტილიაში მყოფი თურქეთის მოქალაქეების უსაფრთხოდ დასაბრუნებლად და მოვლენების განვითარებას სხვა ქვეყნებთან კოორდინაციით აკვირდებიან.
ორშაბათს ისრაელის არმია საერთაშორისო წყლებში თავს დაესხა „გლობალური სუმუდის“ ჰუმანიტარულ ფლოტილიას. ფლოტილიიდან გადაცემულ პირდაპირ ეთერებში ჩანდა, თუ როგორ აჩერებდნენ ისრაელის საზღვაო ძალები გემებს სათითაოდ.
ისრაელის გაზეთ Yedioth Ahronoth-ის ცნობით, დაკავებული აქტივისტები, აშდოდის პორტში გადაყვანამდე, სამხედრო-საზღვაო ხომალდზე გადაიყვანეს, რომელიც „მცურავ ციხედ“ იყო დახასიათებული.
„გლობალური სუმუდის“ დახმარების ფლოტილიამ კი თავის განცხადებაში მოითხოვა „უსაფრთხო დერეფანი“ ღაზის ჰუმანიტარული მისიისთვის და ისრაელი „უკანონო მეკობრეობაში“ დაადანაშაულა.
ფლოტილიის განცხადებაში ნათქვამია: „ისრაელის ძალები ჩვენს ერთ-ერთ პირველ ნავს საერთაშორისო წყლებში, დღისით-მზისით დაესხნენ თავს, მაშინ როცა სამხედრო გემებმა ფლოტილია შეაჩერეს“.
განცხადებაში ასევე ნათქვამია: „ჩვენ ვითხოვთ უსაფრთხო გავლას ჩვენი კანონიერი და არაძალადობრივი ჰუმანიტარული მისიისთვის“.
