ადგილობრივი წყაროების ცნობით, ისრაელის არმიამ ოთხშაბათს ოკუპირებულ დასავლეთ სანაპიროზე ფართომასშტაბიანი სამხედრო რეიდი დაიწყო.

სააგენტო ანადოლუს (AA) კორესპონდენტის ინფორმაციით, არმიამ ჩრდილოეთით მდებარე ტუბასის პროვინციაში ძალები მნიშვნელოვნად გააძლიერა და რამდენიმე ზონაში სამხედრო ტექნიკა განათავსა; ისრაელის ვერტმფრენებმა დასახლებულ პუნქტებს ცეცხლი გაუხსნეს. ზუსტად რა იყო სამიზნე, ჯერჯერობით დაუდგენელია.

ტუბასის გუბერნატორმა, აჰმედ ალ-ასადმა აშშ-ში დაფუძნებულ სოციალურ ქსელ Facebook-ში გაკეთებულ განცხადებაში აღნიშნა: „წლებია, პირველად ხდება, რომ „აპაჩის“ ტიპის ვერტმფრენები ასეთ ოპერაციაში მონაწილეობენ და დასახლებულ პუნქტებს მძიმე ტყვიამფრქვევებიდან ცეცხლს უხსნიან“.

ისრაელის თავდასხმის სამიზნე ქალაქი ტუბასი, ასევე დაბა აკაბა და თამუნი გახდა.

არმიამ კომენდანტის საათი გამოაცხადა და პროვინციის ყველა შესასვლელი და სამხედრო საკონტროლო გამშვები პუნქტებით ჩაკეტა.

გუბერნატორის თქმით, სასწრაფო დახმარების მანქანებისა და სამედიცინო ჯგუფების გადაადგილება შეიზღუდა.

ალ-ასადმა აღნიშნა, რომ ისრაელის ძალებმა თამუნში, ტუბასში, ელ-ფარაასა და თაიასიში რამდენიმე სახლში რეიდი ჩაატარეს და მათი უმეტესობა სამხედრო შტაბად აქციეს.

გუბერნატორმა განაცხადა, რომ ადგილზე არსებულ ვითარებაში ჩასარევად, ჰუმანიტარული შემთხვევებისა და ძირითადი საჭიროებების უზრუნველსაყოფად შეიქმნა საგანგებო კომიტეტი და დაადასტურა, რომ გუბერნია ადგილობრივ ინსტიტუტებთან კოორდინაციაში მუშაობს გადაუდებელი მომსახურების მისაწოდებლად.

უსაფრთხოების ზომების ფარგლებში სკოლებმა და სამუშაო ადგილებმა მუშაობა შეაჩერეს.

თავდასხმები რამდენიმე დღეს გაგრძელდება

ისრაელის არმიამ ოთხშაბათს გავრცელებულ განცხადებაში აღნიშნა, რომ მისმა ძალებმა „შინ-ბეტის“ შიდა უსაფრთხოების სააგენტოსა და პოლიციის ძალებთან ერთად ღამის განმავლობაში ოკუპირებული დასავლეთ სანაპიროს ჩრდილოეთ ნაწილში იმოქმედეს და განაცხადა, რომ ეს რეგიონში „ტერორიზმთან ბრძოლის“ ოპერაციების ნაწილია.

ალ-ასადმა სააგენტო „ანადოლუსთან“ (AA) საუბრისას აღნიშნა, რომ ისრაელის მხარემ პალესტინელ მაღალჩინოსნებს შეატყობინა, რომ პროვინციაში მიმდინარე სამხედრო ოპერაცია კიდევ რამდენიმე დღეს გაგრძელდება და სიტუაცია „სახიფათო დაძაბულობად“ შეაფასა.

გუბერნატორმა უარყო ისრაელის ბრალდებები, თითქოს ტუბასში „ძებნილი პირები“ იმყოფებიან და ხაზგასმით აღნიშნა, რომ „ოპერაცია არა უსაფრთხოებას, არამედ პოლიტიკას უკავშირდება“.

ისრაელის არმიამ ოკუპირებულ დასავლეთ სანაპიროზე თავდასხმები მას შემდეგ გაააქტიურა, რაც 2023 წლის ოქტომბერში ღაზის წინააღმდეგ ომი დაიწყო.

ოკუპირებულ რეგიონში არმიისა და უკანონო ებრაელი მოსახლეების თავდასხმების შედეგად სულ მცირე 1 082 პალესტინელი დაიღუპა და დაახლოებით 11 000 დაშავდა. გარდა ამისა, 20 000-ზე მეტი პალესტინელი დაკავებულია.

გასული წლის ივლისში მიღებული პრეცედენტული გადაწყვეტილებით, მართლმსაჯულების საერთაშორისო სასამართლომ ისრაელის მიერ პალესტინური მიწების ოკუპაცია უკანონოდ გამოაცხადა და ოკუპირებულ დასავლეთ სანაპიროსა და აღმოსავლეთ იერუსალიმში არსებული ყველა დასახლების ევაკუაცია მოითხოვა.