აშშ-ის მასშტაბით მძვინვარე ზამთრის შტორმმა, რომელიც, სპეციალისტების შეფასებით, შესაძლოა „ისტორიული სიძლიერის“ აღმოჩნდეს, საჰაერო მიმოსვლის პარალიზებული მოახდინა. ფრენების დაკვირვების სერვისების მონაცემებით, ორშაბათამდე 14 ათასზე მეტი ავიარეისი გაუქმდა.
FlightAware-ის მონაცემებით, შაბათს 3 898 ფრენა გაუქმდა, კვირას — 8 822, ხოლო ორშაბათს კიდევ 1 549 რეისის გაუქმებაა ნავარაუდები. შაბათს, დამატებით, 3 004 ფრენის დაგვიანებაც დაფიქსირდა.
მოსალოდნელია, რომ შაბათიდან შტორმი აშშ-ის სამხრეთ-დასავლეთიდან ჩრდილო-აღმოსავლეთამდე გადაჭიმულ ფართო ზოლზე მოახდენს გავლენას. მილიონობით ადამიანისთვის საგანგებო მდგომარეობა გამოცხადდა.
აშშ-ის ეროვნულმა მეტეოროლოგიურმა სამსახურმა განაცხადა, რომ ოკლაჰომიდან სამხრეთ მეინის შტატამდე ძლიერი თოვაა მოსალოდნელი, ხოლო სამხრეთ და სამხრეთ-აღმოსავლეთ შტატებში მოსალოდნელია ყინულოვანი წვიმა და თოვლჭყაპი.
აშშ-ის პრეზიდენტმა დონალდ ტრამპმა მანამდე გააკეთა გაფრთხილება, რომ „რეკორდული სიცივის ტალღა“ ათეულობით შტატს დაატყდებოდა თავს. ტრამპმა 12 შტატისთვის საგანგებო მდგომარეობის გამოცხადებას მოაწერა ხელი, ხოლო სულ მცირე 22 შტატსა და ვაშინგტონში საგანგებო რეჟიმი დაწესდა.
ელექტროენერგიის გათიშვა
ელექტროენერგიის გათიშვის შემთხვევების რაოდენობა კვლავ იზრდება. PowerOutage.com-ის მონაცემებით, ადგილობრივი დროით 18:30 საათისთვის 130 ათასზე მეტი ამერიკელი აბონენტი ელექტროენერგიის გარეშე დარჩა. გათიშვების უმეტესობა ტეხასისა და ლუიზიანას შტატებში დაფიქსირდა.
აშშ-ის ეროვნულმა მეტეოროლოგიურმა სამსახურმა გაავრცელა გაფრთხილება, რომ ქვეყნის სამხრეთ-აღმოსავლეთში განსაკუთრებით მასშტაბური და ხანგრძლივი ზამთრის შტორმი იქნება, რასაც შესაძლოა „პარალიზებადი და ზოგან დამანგრეველი შედეგები“ მოჰყვეს.
მეტეოროლოგიის ექსპერტები ვარაუდობენ, რომ ორშაბათამდე აშშ-ის დიდი ვაკეების რეგიონში რეკორდულად დაბალი ტემპერატურა და სახიფათო დონის ყინვა კიდევ უფრო გაძლიერდება.
