აშშ-ის ეროვნული უსაფრთხოების სააგენტოს დირექტორი და მოადგილე თანამდებობიდან გაათავისუფლეს.

აშშ-ის პრეზიდენტი დონალდ ტრამპი, იანვარში თანამდებობის დაკავების შემდეგ, შეიარაღებული ძალების ხელმძღვანელობაში ფართომასშტაბიან ცვლილებებს ახორციელებს.

აშშ-ის ერთ-ერთი საიდუმლო სადაზვერვო სააგენტოს, ეროვნული უსაფრთხოების სააგენტოს (NSA) დირექტორი და მისი მოადგილე ხუთშაბათს თანამდებობიდან გაათავისუფლეს. გადაწყვეტილებას ამერიკულ მედიაში ფართო გამოხმაურება მოჰყვა.

ვაშინგტონ პოსტი, ანონიმურ ამერიკელ ოფიციალურ პირებზე დაყრდნობით წერს, რომ გენერალი ტიმოთი ჰოგი თანამდებობის დაკავებიდან მცირე ხნის შემდეგ გაათავისუფლეს. გამოცემის ცნობით, ჰოგს გათავისუფლების მიზეზი არ დასახელებულა.

ჰოგი ასევე იყო აშშ-ის თავდაცვის სამინისტროს კიბერ ოპერაციებზე პასუხისმგებელი ერთეულის, აშშ-ის კიბერ სარდლობის (US Cyber Command) ხელმძღვანელი. ეს უწყება ახორციელებს როგორც თავდაცვით, ისე თავდასხმით კიბერ ოპერაციებს.

გავრცელებული ინფორმაციით, ჰოგის მოადგილე, NSA-ს დირექტორის მოადგილე ვენდი ნობლეც გაათავისუფლეს და პენტაგონში სხვა პოზიციაზე გადაიყვანეს.

NSA ცნობილია, როგორც აშშ-ის მთავრობის უდიდესი და ყველაზე საიდუმლო სიგნალების დაზვერვის სააგენტო.

პენტაგონს სააგენტო AFP-ს კომენტარის მოთხოვნაზე ჯერჯერობით პასუხი არ გაუცია.

2024 წლის თებერვალში დანიშნულ გენერალ ჰოგს მანამდე ეკავა არაერთი კრიტიკულად მნიშვნელოვანი თანამდებობა კიბერუსაფრთხოების სფეროში, მათ შორის ელიტური კიბერ ეროვნული მისიის ძალების მეთაურის პოსტი.

თანამდებობიდან გათავისუფლებებს დემოკრატი კონგრესმენი ჯიმ ჰაიმსი მწვავედ გამოეხმაურა. X-ზე გაკეთებულ განცხადებაში მან თქვა: „ვიცი, რომ გენერალი ჰოგი იყო პატიოსანი და პირდაპირი ლიდერი, რომელიც იცავდა კანონს და უპირატესობას ანიჭებდა ეროვნულ უსაფრთხოებას“.

„სამწუხაროდ, ამ ადმინისტრაციაში სწორედ ეს თვისებები შეიძლება გახდეს ადამიანის თანამდებობიდან გათავისუფლების მიზეზი“, - დაამატა მან.

პრეზიდენტი დონალდ ტრამპი, იანვარში თანამდებობის დაკავების შემდეგ, უმაღლეს სამხედრო ხელმძღვანელობაში დიდ ცვლილებებს ახორციელებს. თებერვალში, ყოველგვარი დასაბუთების გარეშე, თანამდებობიდან გაათავისუფლეს გაერთიანებული შტაბების მეთაური, გენერალი ჩარლზ ბრაუნი, რომელსაც თანამდებობაზე ყოფნის მეორე წელი ეწყებოდა.

ტრამპის ადმინისტრაცია, მისი მეორე ვადის პირველ თვეებში, ასევე დგამს ფართომასშტაბიან ნაბიჯებს ფედერალური თანამშრომლების მასობრივი დათხოვნის და სახელმწიფო უწყებების უფლებამოსილებების შემცირების მიმართულებით.

ვაშინგტონ პოსტი-ს ცნობით, აშშ-ის კიბერ სარდლობის მეთაურის მოადგილე უილიამ ჰარტმანი და NSA-ს აღმასრულებელი დირექტორი შეილა ტომასი დროებით დაინიშნენ NSA-ს დირექტორისა და დირექტორის მოადგილის მოვალეობის შემსრულებლად.