რუსული სახელმწიფო მედიის ცნობით, რუსული უპილოტო საფრენი აპარატების მწარმოებელი კომპანიის ხელმძღვანელი ოთხშაბათს, ქვეყნის ცენტრალურ ნაწილში, ეკატერინბურგის მახლობლად, საკუთარ ავტომობილში მომხდარი აფეთქების შედეგად მძიმედ დაიჭრა.
სააგენტო TASS-ი საგანგებო სიტუაციების სამსახურზე დაყრდნობით იტყობინება, რომ „ურალდრონზავოდის“ გენერალური დირექტორი ვლადიმერ ტკაჩუკი ჰოსპიტალიზებულია და რეანიმაციულ განყოფილებაში იმყოფება.
საგანგებო სიტუაციების სამსახურის წარმომადგენელმა TASS-ს განუცხადა: „მისი მდგომარეობა მძიმეა და რეანიმაციაშია. ექიმები მისი სიცოცხლის გადასარჩენად იბრძვიან“.
აფეთქების მიზეზი ჯერჯერობით დაუდგენელია. რუსეთის ხელისუფლებას არ გაუკეთებია განცხადება იმის შესახებ, იყო თუ არა ეს განზრახ თავდასხმა და მომხდარში უკრაინა არ დაუდანაშაულებია.
„ურალდრონზავოდი“ შეიმუშავებს და აწარმოებს უპილოტო საფრენ სისტემებს, მათ შორის FPV ტიპის დრონ „უპირს“ (Upyr), რომელსაც რუსული ძალები იყენებენ.
ომის დაწყების შემდეგ, რუსეთის არაერთი მაღალჩინოსანი სამხედრო და თავდაცვის მრეწველობასთან დაკავშირებული პირი გახდა აფეთქებებისა და სხვა თავდასხმების სამიზნე, რაშიც მოსკოვი ხშირად უკრაინას ადანაშაულებს.
