პოლონეთის საზოგადოებრივი მაუწყებლის, TVP World-ის ინფორმაციით, ახალი სასწავლო წლის დაწყებასთან ერთად, ქვეყნის მასშტაბით დაწყებითი კლასის მოსწავლეებს ეკრძალებათ ტელეფონებისა და მსგავსი ელექტრონული მოწყობილობების გამოყენება გაკვეთილების, დასვენებებისა და სხვა სასკოლო აქტივობების დროს.
სკოლამდელი აღზრდის დაწესებულებებში კი ბავშვებს მსგავსი მოწყობილობების სკოლაში მიტანის უფლებაც არ აქვთ.
რეგულაცია ითვალისწინებს გამონაკლისებს ტელეფონების საგანმანათლებლო მიზნით გამოყენების, საგანგებო სიტუაციებში მშობლებთან კონტაქტის, ჯანმრთელობისა თუ სიცოცხლისათვის პირდაპირი საფრთხის შემცველი მდგომარეობებისა და გარკვეული ჯანმრთელობის ან სპეციალური საჭიროებების შემთხვევებისთვის.
საშუალო სკოლები (ლიცეუმები) ქვეყნის მასშტაბით მოქმედი ამ აკრძალვის ფარგლებში არ შედიან, თუმცა სკოლებს შეუძლიათ საკუთარი შინაგანაწესით თავად დააწესონ რეგულაციები მოსწავლეების მიერ მობილური ტელეფონების გამოყენებასთან დაკავშირებით.
ეს რეგულაცია ხორციელდება, როგორც მთავრობის უფრო ფართომასშტაბიანი კამპანიის ნაწილი, რომელიც მიზნად ისახავს ბავშვების მავნე ონლაინ კონტენტთან კონტაქტის შემცირებას.
ამასთანავე, პოლონეთის მთავრობამ განაცხადა, რომ მუშაობს ახალ საკანონმდებლო რეგულაციაზე, რომელიც 15 წლამდე ასაკის ბავშვების მიერ სოციალური მედიის გამოყენებას შეეხება.
