პოლიციამ განაცხადა, რომ ენდრიუ მაუნტბეტენ-უინძორი, რომელსაც პრინცის ტიტული ჩამოერთვა, სავაჭრო წარმომადგენლობის პერიოდში სამსახურებრივი უფლებამოსილების ბოროტად გამოყენების ეჭვით დააკავეს.

პოლიციის სამსახურმა ხუთშაბათს, დიდი ბრიტანეთის კანონმდებლობის შესაბამისად, მაუნტბეტენ-უინძორის ვინაობა ოფიციალურად არ დაასახელა. თუმცა, კითხვაზე, მოხდა თუ არა მისი დაკავება, პოლიციამ მიუთითა განცხადებაზე, რომელშიც აღნიშნული იყო 60-იანი წლების ასაკის მამაკაცის დაკავების შესახებ.

„გამოძიების ფარგლებში, დღეს (19/02) ნორფოლკში დავაკავეთ 60-იანი წლების ასაკის მამაკაცი, საჯარო უფლებამოსილების ბოროტად გამოყენების ეჭვით“, - ნათქვამია თემზის ველის (Thames Valley) პოლიციის განცხადებაში.

„საკითხის ყოველმხრივი შეფასების შემდეგ, დავიწყეთ გამოძიება საჯარო უფლებამოსილების სავარაუდო ბოროტად გამოყენების ფაქტზე. ამ დანაშაულის გამოსაძიებლად ჩვენს პარტნიორებთან ერთად ვმუშაობთ და ამ პროცესში უაღრესად მნიშვნელოვანია გამოძიების მთლიანობისა და ობიექტურობის დაცვა“, - აღნიშნულია განცხადებაში.

პოლიციამ ასევე დასძინა, რომ დაკავების შემდეგ ჩხრეკა ჩატარდა ორ მისამართზე: ერთი ინგლისის აღმოსავლეთით, ხოლო მეორე - დედაქალაქ ლონდონის დასავლეთ ნაწილში.

გასულ კვირას გავრცელებული ახალი ინფორმაციით, ენდრიუმ ბრიტანეთის სავაჭრო წარმომადგენლად მუშაობისას საიდუმლო დოკუმენტები სექსუალურ დანაშაულებში მსჯავრდებულ ჯეფრი ეპშტეინს გადასცა.