ამერიკის შეერთებული შტატების პრეზიდენტმა, დონალდ ტრამპმა აღნიშნა, რომ თუ მოკავშირეები არ დაეხმარებიან ჰორმუზის სრუტის გახსნაში - ნავთობის გადაზიდვის კრიტიკულ მარშრუტში, რომელიც ირანის მიერ ფაქტობრივად ჩაკეტილია - ნატო „ძალიან ცუდი“ მომავლის წინაშე აღმოჩნდება.
კვირას Financial Times-ისთვის მიცემულ მოკლე ინტერვიუში ტრამპმა განაცხადა, რომ ისევე როგორც აშშ ეხმარება უკრაინას რუსეთთან ომში, ის ევროპისგანაც ელის დახმარებას ჰორმუზის სრუტესთან დაკავშირებით, რომლის ჩაკეტვამაც მსოფლიო მასშტაბით ენერგორესურსებზე ფასების ზრდა გამოიწვია.
ტრამპმა, რომელიც წლების განმავლობაში აკრიტიკებდა ალიანსს აშშ-ის ხელგაშლილობით სარგებლობის გამო, აღნიშნა: „თუ პასუხი არ იქნება, ან თუ ის უარყოფითი იქნება, ვფიქრობ, ეს ნატოს მომავლისთვის ძალიან ცუდი იქნება. სავსებით მართებული იქნებოდა, მათ, ვინც სრუტით სარგებლობს, დაგვეხმარონ იქ რაიმე ცუდის თავიდან აცილებაში“.
როდესაც ჰკითხეს კონკრეტულ დახმარებაზე, რომელსაც ის ითხოვს, ტრამპმა Financial Times-ს განუცხადა, რომ ნაღმების მაძიებლებთან (სკანერებთან) ერთად, მას სჭირდება „ხალხი, ვინც გაანეიტრალებს (ირანის) სანაპიროს გასწვრივ მყოფ ზოგიერთ ბოროტ აქტორს“.
მოლაპარაკებები ირანთან
ტრამპმა აღნიშნა, რომ ჰორმუზის სრუტის უსაფრთხოების უზრუნველყოფის საკითხზე შვიდ ქვეყანასთან აწარმოებს მოლაპარაკებებს. მან ასევე დასძინა, რომ ვაშინგტონს აქვს კონტაქტი ირანთან, თუმცა ეჭვი ეპარება, რომ თეირანი მზად არის კონფლიქტის დასასრულებლად სერიოზული მოლაპარაკებებისთვის.
„Air Force One“-ის ბორტზე ჟურნალისტებთან საუბრისას ტრამპმა თქვა, რომ მისი ადმინისტრაცია ელაპარაკება ირანს, „თუმცა არ მგონია, რომ ისინი მზად იყვნენ“.
გაურკვევლობამ იმასთან დაკავშირებით, თუ რამდენ ხანს გაგრძელდება ირანის წინააღმდეგ წარმოებული ომი, შეარყია ნავთობის ბაზარი, სადაც ბოლო ორი კვირის განმავლობაში მიწოდების რისკების გამო ნედლი ნავთობის ფასები სწრაფად გაიზარდა.
კვირას, ამერიკული ნავთობის ეტალონის, West Texas Intermediate-ის (WTI) ფასი 2,5%-ით გაიზარდა და ბარელზე 100,22 დოლარი შეადგინა, ხოლო საერთაშორისო ეტალონის, Brent-ის ფასი 2,9%-ით გაიზარდა და ბარელზე 106,11 დოლარს მიაღწია.
