სამხრეთ კორეის საგარეო საქმეთა მინისტრმა ჩო ჰიუნმა განაცხადა, რომ სეული და ვაშინგტონი განიხილავენ ქვეყანაში განთავსებული აშშ-ის „პატრიოტის“ ტიპის საზენიტო-სარაკეტო სისტემების ნაწილის შესაძლო გადასროლას ახლო აღმოსავლეთში მიმდინარე ოპერაციების მხარდასაჭერად, ირანთან მზარდი დაძაბულობის ფონზე.

პარასკევს, პარლამენტის სხდომაზე გამოსვლისას, ჩომ აღნიშნა, რომ ორივე ქვეყნის სამხედრო მაღალჩინოსნები მჭიდრო კონსულტაციებს მართავენ, თუმცა თავი შეიკავა იმის დადასტურებისგან, რომ რაკეტები უახლოეს მომავალში ირანთან დაკავშირებულ კონფლიქტში გამოსაყენებლად გაიგზავნება.

„ზოგადად, ორივე ქვეყნის სამხედრო უწყებები აგრძელებენ მჭიდრო კონსულტაციებს სტრატეგიული ელემენტების განლაგებასთან დაკავშირებით“, — განაცხადა ჩომ და დასძინა, რომ შესაძლო გადაჯგუფების შესახებ პირდაპირ კომენტარს ვერ გააკეთებდა.

ჩოს განცხადებები მოჰყვა სამხრეთ კორეული მედიის ცნობებს იმის შესახებ, რომ აშშ-ის „პატრიოტის“ მობილური საზენიტო სისტემების რამდენიმე ერთეული ქვეყნის სხვა ამერიკული ბაზებიდან კიონგიდოს პროვინციაში, ფიონთეკში მდებარე ოსანის ავიაბაზაზე გადაიტანეს.

სამთავრობო წყაროებზე დაყრდნობით გავრცელებულ ანგარიშებში გამოითქვა ვარაუდი, რომ ეს სისტემები, შესაძლოა, ახლო აღმოსავლეთში გადასასროლად მზადდებოდეს.

ადგილობრივი მედიის ცნობით, ბაზაზე ასევე შენიშნეს აშშ-ის ისეთი სამხედრო-სატრანსპორტო თვითმფრინავები, როგორიცაა C-17 და C-5, რამაც გააძლიერა ვარაუდები სამხრეთ კორეიდან საჰაერო თავდაცვის სისტემების შესაძლო გაგზავნის შესახებ.

გასულ წელს, „პატრიოტის“ ორი ბატარეა C-17 თვითმფრინავებით გადაიტვანეს ახლო აღმოსავლეთში; ეს მოხდა სულ რაღაც რამდენიმე თვით ადრე ივნისში ირანის ბირთვულ ობიექტებზე აშშ-ისა და ისრაელის თავდასხმებამდე. აღნიშნული ორი ერთეული კორეაში ოქტომბერში დააბრუნეს.

ეს მოვლენები ემთხვევა იმ პერიოდს, როდესაც ვრცელდება ინფორმაცია იმის შესახებ, რომ ახლო აღმოსავლეთსა და უკრაინაში მიმდინარე კონფლიქტების ფონზე, ევროპელი მაღალჩინოსნები შეშფოთებულნი არიან რაკეტსაწინააღმდეგო თავდაცვის სისტემების დეფიციტის გამო.

კორეაში აშშ-ის შეიარაღებული ძალების წარმომადგენლებმა კომენტარისგან თავი შეიკავეს.

სარდლობის განცხადებაში ნათქვამია: „ოპერატიული უსაფრთხოების მიზნით, ჩვენ არ ვაკეთებთ კომენტარს კონკრეტული სამხედრო შესაძლებლობების ან ელემენტების გადაადგილების, გადაჯგუფების ან პოტენციური დისლოკაციის შეცვლის შესახებ“.

ჩომ ასევე აღნიშნა, რომ სამხრეთ კორეას კონფლიქტთან დაკავშირებით ვაშინგტონისგან სამხედრო მხარდაჭერის შესახებ ოფიციალური მოთხოვნა არ მიუღია.

აშშ-ის პრეზიდენტმა დონალდ ტრამპმა მანამდე განაცხადა, რომ ვაშინგტონი მიიღებდა დახმარებას ნებისმიერი ქვეყნისგან ირანის წინააღმდეგ მიმართულ ოპერაციებში.

მოვლენები ვითარდება იმ დროს, როდესაც აშშ-ისა და ისრაელის ძალები რამდენიმე დღის განმავლობაში ახორციელებდნენ დარტყმებს ირანის ტერიტორიაზე არსებულ სტრატეგიულ ობიექტებზე, რაც ტრამპმა შეაფასა, როგორც თეირანის ბირთვული იარაღისა და ბალისტიკური რაკეტების პოტენციალის პარალიზების მცდელობა.

სამხრეთ კორეაში, ბირთვული იარაღის მქონე ჩრდილოეთ კორეის წინააღმდეგ მოკავშირეთა ერთიანი თავდაცვის ფარგლებში, დაახლოებით 28,500 ამერიკელი სამხედროა დისლოცირებული; ნახევარკუნძულზე განლაგებულია საჰაერო თავდაცვის მრავალი სისტემა, მათ შორის „პატრიოტის“ რაკეტსაწინააღმდეგო სისტემები.