ქუვეითის ხელისუფლებამ განაცხადა, რომ ქუვეითის საერთაშორისო აეროპორტზე ირანული წარმოშობის უპილოტო საფრენი აპარატით განხორციელებული თავდასხმის შემდეგ, ოთხშაბათს კომერციული ფრენები შეჩერდა. თავდასხმამ, რომლის დროსაც არაერთი ადამიანი დაშავდა, სამგზავრო ტერმინალის დაზიანება გამოიწვია.
ქუვეითის თავდაცვის სამინისტროს წარმომადგენელმა, ბრიგადის გენერალმა საუდ აბდულაზიზ ელ-ოთეიბიმ განაცხადა, რომ „მტრის მრავალმა უპილოტო საფრენმა აპარატმა“ ქუვეითის საერთაშორისო აეროპორტი ამოიღო მიზანში, რის შედეგადაც რამდენიმე ადამიანი დაშავდა და სერიოზული ზიანი დაფიქსირდა. ხელისუფლებას დაშავებულთა მდგომარეობის ან ფრენების განახლების შესახებ დეტალური ინფორმაცია ჯერჯერობით არ გაუვრცელებია. ქუვეითის ოფიციალური პირების თქმით, უსაფრთხოების სამსახურები ზარალის დადგენაზე მუშაობენ და სიტუაციას ყურადღებით აკვირდებიან.
აეროპორტზე ეს თავდასხმა მოხდა ირანისა და ამერიკის შეერთებული შტატების მიერ განხორციელებული საპასუხო იერიშებიდან რამდენიმე საათში, იმ პერიოდში, როდესაც გრძელდება დიპლომატიური ძალისხმევა აშშ/ისრაელსა და ირანს შორის თებერვალში დაწყებული კონფლიქტის საბოლოოდ დასრულების მიზნით.
აშშ-ის არმიამ განაცხადა, რომ მას შემდეგ, რაც თეირანმა სამშაბათს გვიან ღამით ქუვეითისა და ბაჰრეინის მიმართულებით რაკეტები გაუშვა, ირანის სამხედრო ობიექტზე საჰაერო იერიში მიიტანა.
ბოლო მოვლენებმა კვლავ გაამწვავა შეშფოთება კრიტიკული ინფრასტრუქტურისა და სამოქალაქო სატრანსპორტო ქსელების უსაფრთხოებასთან დაკავშირებით სპარსეთის ყურის რეგიონში, რომელიც ისედაც დაძაბულია თვეების განმავლობაში მიმდინარე სამხედრო დაპირისპირებისა და საზღვაო თუ საჰაერო მიმოსვლის შეფერხებების გამო.
