პრეზიდენტმა რეჯეფ თაიფ ერდოღანმა რესპუბლიკის 103 წლისთავთან დაკავშირებით გავრცელებულ გზავნილში განაცხადა: „მადლობა ღმერთს, თურქეთი დღეს გუშინდელზე ძლიერია. ღვთის ნებით, ხვალ კიდევ უფრო ძლიერი და ბევრად უფრო გავლენიანი იქნება“.
პრეზიდენტმა რეჯეფ თაიფ ერდოღანმა რესპუბლიკის 103 წლისთავთან დაკავშირებით ვიდეომიმართვა გაავრცელა:
„დღეს ჩვენ დიდი სიამაყითა და ზეიმით აღვნიშნავთ ჩვენი რესპუბლიკის დაარსების 103 წლისთავს. 29 ოქტომბრის რესპუბლიკის დღეს ვულოცავ ჩვენს ძვირფას ერს, კვიპროსელ თურქ ძმებსა და მსოფლიოს სხვადასხვა კუთხეში მცხოვრებ ყველა ჩვენს თანამოქალაქეს.
გულწრფელ მადლობას ვუხდი ჩვენს ძვირფას სტუმრებს, რომლებმაც საზღვარგარეთ ჩვენს დიპლომატიურ მისიებში გაიზიარეს სადღესასწაულო სიხარული და აღფრთოვანება. ასევე სიყვარულით ვეხვევი ყველა იმ მეგობარსა და ძმას, ვისი გულიც ჩვენს ერთან ერთად ცემს ჩვენი სულიერი და კულტურული სივრცის სხვადასხვა კუთხეში, ვინც ჩვენთან ერთად ხარობს, ჩვენთან ერთად სწუხს და ვისთანაც ბედისა და სულის ერთობა გვაკავშირებს.
ჩვენი რესპუბლიკა თურქი ერის – რომლის ისტორიაც სახელოვანი გამარჯვებებითა და ბრძოლებითაა სავსე – დამოუკიდებლობის ნების, თავისუფლად ცხოვრების სიმტკიცისა და საკუთარი მომავლის განსაზღვრის ურყევი სწრაფვის უძლიერესი სიმბოლოა. ეროვნულმა ბრძოლამ, რომელიც გაზი მუსტაფა ქემალის წინამძღოლობითა და უდიდესი თავგანწირვით წარვმართეთ, მთელ მსოფლიოს აჩვენა, თუ რისი მიღწევა შეუძლია ერთიანობით შეკრულ ერს ყველაზე რთულ პირობებშიც კი. უმძიმეს ვითარებაში მოპოვებულმა ამ დიდმა წარმატებამ არა მხოლოდ ერთი ერის ბედი შეცვალა, არამედ ისტორიაში სამუდამოდ აღბეჭდა ეროვნული ნების ძალა და დამოუკიდებლად ცხოვრების უფლების ხელშეუხებლობა.
ზუსტად 103 წლის წინ ჩვენი ერის მიერ გამოჩენილი შემართება, სიმამაცე და სიმტკიცე დღესაც ჩვენი მოტივაციის უძლიერეს წყაროდ რჩება. ბოლო 24 წლის განმავლობაში თავდაცვის მრეწველობიდან ენერგეტიკამდე, ტრანსპორტიდან დიპლომატიამდე განვლილ გზას განვიხილავთ, როგორც გავლენიანი და აყვავებული თურქეთისკენ მიმავალ მნიშვნელოვან ეტაპებს. ჩვენი ქვეყანა, რომელიც ავითარებს საკუთარ ტექნოლოგიებს, ზრდის შესაძლებლობებს თავდაცვის სფეროში, აძლიერებს ენერგომომარაგების უსაფრთხოებას, ეპოქის მოთხოვნების შესაბამისად ანახლებს სატრანსპორტო ინფრასტრუქტურას და განუწყვეტლივ ზრდის წარმოების სიმძლავრეებს, მტკიცე ნაბიჯებით მიიწევს კიდევ უფრო ძლიერი მომავლისკენ“.
