ეგვიპტის სახელმწიფო მედია და ეგვიპტის „წითელი ნახევარმთვარის“ წარმომადგენელი იტყობინებიან, რომ ხუთშაბათს ღაზა-ეგვიპტის საზღვარი, ისრაელისა და აშშ-ის მიერ ირანზე თავდასხმების დაწყების შემდეგ, პირველად გაიხსნა ადამიანთა შეზღუდული რაოდენობისთვის.

ეგვიპტის „წითელი ნახევარმთვარის“ წარმომადგენელმა, რომელმაც ვინაობის გამხელა არ ისურვა, სააგენტო AFP-ს განუცხადა, რომ რაფაჰის გამშვები პუნქტი ორივე მიმართულებით გაიხსნა, რაც პალესტინელ პაციენტებს ეგვიპტეში გადასვლის, ხოლო ჩარჩენილ პალესტინელებს ღაზაში დაბრუნების საშუალებას მისცემს.

ტელეარხმა „Al-Qahera News“-მა, რომელიც ეგვიპტის სპეცსამსახურებთან დაახლოებული მედიაა, გამოაქვეყნა კადრები, სადაც ჩანს პალესტინელთა მცირე ჯგუფი, მათ შორის პირები, რომლებმაც მკურნალობა გაიარეს და ეგვიპტიდან ღაზაში დაბრუნებას ელოდებიან. გარდა ამისა, კადრებში ჩანდა რამდენიმე სასწრაფო დახმარების მანქანა, რომლებიც დანგრეული პალესტინური ტერიტორიებიდან გამოსული პაციენტების მისაღებად ელოდნენ.

ისრაელმა კვირის დასაწყისში გამოაცხადა, რომ რაფაჰის გადასასვლელი ოთხშაბათს გაიხსნებოდა, თუმცა აღნიშნული პუნქტი მაშინ არ გახსნილა. გავრცელებულ განცხადებაში ნათქვამი იყო, რომ მიმოსვლა ეგვიპტესთან კოორდინაციით, ისრაელის უსაფრთხოების სამსახურის თანხმობითა და ევროკავშირის სასაზღვრო მისიის მონიტორინგით აღდგებოდა.

ისრაელის თავდაცვის სამინისტროს ქვედანაყოფის, COGAT-ის ინფორმაციით, რომელიც პალესტინის ტერიტორიებზე სამოქალაქო საკითხებს ზედამხედველობს, მგზავრები ღაზის შიგნით, ისრაელის არმიის მიერ კონტროლირებად ტერიტორიაზე, უსაფრთხოების დამატებით შემოწმებას გაივლიან.

ევროკავშირმა რაფაჰში სასაზღვრო დახმარების მისიის (EUBAM) წარმომადგენლები თებერვლის დასაწყისში განათავსა.

რაფაჰი, რომელიც ისრაელის ძალებმა ღაზის ომის დროს, დაახლოებით ორი წლის წინ დაიკავეს, 2 თებერვალს შეზღუდული გადაადგილებისთვის მცირე ხნით გაიხსნა, თუმცა ირანზე თავდასხმების დაწყების გამო ისრაელის მიერ ყველა გამშვები პუნქტის ჩაკეტვის შემდეგ, 28 თებერვალს კვლავ დაიხურა. ისრაელის მიერ კონტროლირებადი „კერემ შალომის“ სასაზღვრო პუნქტი რამდენიმე დღის შემდეგ კვლავ გაიხსნა შეზღუდული ჰუმანიტარული დახმარების, მათ შორის საწვავის შესატანად.

ბევრი დაშავებული და დაავადებული ღაზელისთვის რაფაჰი ეგვიპტეში სამედიცინო დახმარების მიღების სასიცოცხლო გზა და დაშორებული ოჯახების გაერთიანების ერთ-ერთი იშვიათი საშუალება გახდა. თუმცა, მიუხედავად გასულ თვეში გახსნისა, პალესტინელთა მხოლოდ მცირე ნაწილს დართეს გადასვლის ნება.

ეგვიპტელი სასაზღვრო სამსახურის სამი ოფიციალური პირის თანახმად, ეგვიპტეში შესვლის ყოველდღიური კვოტა 50 პაციენტით შემოიფარგლა; თითოეულ პაციენტს მაქსიმუმ ორი თანმხლები პირი შეიძლება ახლდეს, ხოლო ღაზაში დაბრუნების ნებადართული რაოდენობაც დღეში 50 ადამიანით განისაზღვრა. მათ, ვინც თებერვალში საზღვრის ხანმოკლე გახსნის დროს დაბრუნდა, განაცხადეს, რომ უსაფრთხოების მკაცრი შემოწმება და დაკითხვები გაიარეს.